13 дугаар зууны цэргийн занданшуулсан шарилыг модон авс хэмээж хилээр гаргахыг завджээ

2020 оны 07 сарын 28

Энэ оны нэгдүгээр улирал улсын хилээр 13-р зууны үеийн цэргийн занданшуулсан шарил авс гэж худал мэдүүлэн, гаргах гэж байсныг Гаалийн Ерөнхий Газар илрүүлэн, таслан зогсоожээ. Хэргийн цагдаагийн байгууллагад шилжүүлсэн бөгөөд мөрдөн шалгах ажиллагаа үргэлжилж байна.

Энэ оны нэгдүгээр улирал буюу коронавирустай холбоотойгоор хил хаагаагүй байх үед уг үйл явдал болсон байна. Хувь хүн биш хуулийн этгээд буюу аж ахуй нэгж, эсвэл компани уг хэргийг үйлдсэн байна. Улмаар хилээр гаргах бичиг баримтад худал мэдээлэн, 13-р зууны үеийн цэргийн занданшуулсан шарил болон дагалдах зэвсэг хэрэгсэлтэй нь хил гаргахыг завдсан байна.

13 дугаар зууны үеийн цэргийн занданшуулсан шарилыг модон авс гэж хилээр гаргахыг завджээ

Гаалийн ерөнхий газрын албаны дарга Б.Сүхбаатар “2020 оны нэгдүгээр улиралд Монгол Улсын хуулийн этгээд 13 дугаар зууны үеийн баатар эрийн мумми байж болзошгүй хатаасан шарил болон эд хэрэгслийн хамт улсын хилээр гаргахаар гаалийн мэдүүлэг хийх явцдаа худал мэдээлсэн холбогдох дагалдах эд хэрэгслийг бүрэн мэдүүлээгүй зөрчлүүд илэрсэн. Гаалийн байгууллагын зүгээс хуулийн харьяаллын дагуу энэ хэргийг шалгаад цагдаагийн байгууллагад  шилжүүлэн шалгуулж байгаа. Үүнд мэргэжлийн байгууллагын дүгнэлт эцэслэн гараад хэрэг бүртгэл мөрдөн байцаалтын ажил дууссаны дараа цагдаагийн байгууллагаас тодорхой мэдээллүүдийг өгөх байх.

Ихэвчлэн музей, үзмэрийн зориулттайгаар түүх соёлын зүйлсийг гадаад улсад түр хугацаагаар өөрчлөлт оруулахгүйгээр эргүүлж оруулж ирэх гаалийн бүрдүүлэлтийн тусгай горим байдаг. Одоо хилийн хөдөлгөөн бүрэн зогссон байгаа. Тухайн хэрэг мөрдөн байцаалтын шатанд байгаа болохоор нарийн мэдээлэл өгөх боломжгүй” гэв.

Тухайн занданшуулсан шарилыг хосгүй үнэт өвд бүртгээгүй байсан. Хаанаас ямар зорилгоор авч, улмаар хилээр гаргах гэж байсан ч тодорхойгүй байна.  Энэ төрлийн гэмт хэрэг өмнө нь бүртгэгдэж байсан. Хамгийн олны анхаарлыг татсан нь Улаанбаатар  хотын нутаг дэвсгэрээс олдсон 2015 онд олдсон 200 жилийн настай занданшуулсан шарил байсан. Энэ мэт хосгүй үнэт өвд багтах ёстой ховор олдвор, үзмэрүүдийг хилээр гаргах оролдлого гарсаар байна. 

ЦЕГ-аас өгсөн мэдээллээр энэ оны эхний 6 сарын байдлаар улсын хилээр хууль бусаар барааг гаргах  гэсэн 20 гэмт хэрэг улсын хэмжээнд бүртгэгдсэн байна. Үүний 18-д нь хэрэг бүртгэлийн хэрэг нээж, 8-д нь Эрүүгийн хэрэг үүсгэж, яллагдагчаар татсан байна.  Харин 2018 онд Улсын хилээр барааг хууль бусаар нэвтрүүлэх хэрэг нийт 53 бүртгэгдсэн байна, Үүнээс 47-д нь хэрэг бүртгэлийн хэрэг нээж, 32-т нь Эрүүгийн хэрэг үүсгэж, яллагдагчаар татсан байна.  Харин 2019 онд Улсын хилээр барааг хууль бусаар нэвтрүүлэх хэрэг нийт 89 бүртгэгдсэн. Үүнээс 74-д нь хэрэг бүртгэлийн хэрэг нээж, 45-т нь Эрүүгийн хэрэг үүсгэж, яллагдагчаар татаж шийдвэрлэжээ. 

Улсын хилээр барааг хууль бусаар нэвтрүүлэх зүйлийн бараа гэдэгт бүх төрлийн бараа занданшуулсан шарил, үзмэрүүд багтана. Улсын хилээр барааг хууль бусаар нэвтрүүлэх хэргийг Эрүүгийн хуулийн 18.5-д заасанаар хариуцлага тооцно. Эрүүгийн хуулийн  18.5 дугаар зүйл.Улсын хилээр барааг хууль бусаар нэвтрүүлэх, 3.Энэ гэмт хэргийг түүх, соёлын хөдлөх дурсгалт зүйл, музейн үзмэр, эртний амьтны, ургамлын өвөрмөц ховор үнэт олдвор, археологийн, палеонтологийн олдвор, эд өлгийн зүйлийг улсын хилээр хууль бусаар нэвтрүүлж үйлдсэн бол арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгэнэ гэж заасан байна.

 

Eagle.mn

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.