Г.Ундармаа: Одоо Ари асуудлаа яаж шийдвэрлэх л сонин байна

2020 оны 09 сарын 25

“U film”-ийн бүтээл романтик инээдмийн “Single ladies” буюу “Ганц бие бүсгүйчүүд” цуврал уран сайхны киноны дөрөвдүгээр анги 2020 оны аравдугаар сарын 1-нд нээлтээ хийхээр болжээ. 2013 оноос хойш нийтдээ гурван анги үзэгчдийн хүртээл болсон уг киноны төгсгөлийн анги арван гуравдугаар зууны үеийн аж байдлыг харуулах түүхэн сэдэвтэй гэдгээрээ онцлог ажээ. Кино тун удахгүй нээлтээ хийх  гэж байгаа энэ цаг мөчид продюсер, жүжигчин Г.Ундармаатай  уран бүтээл, цаг үеийн асуудлаар  ярилцлаа. 

- Юуны өмнө танд шинэ уран бүтээлийнхээ нээлтийг хийх гэж байгаад баяр хүргэе.  Удтал дуншсан  “Single Ladies”-4  зохиолын санаа  утга агуулга ямар байх бол? 

- Баярлалаа. Сүүлийн анги  маань зарлагдаж хойшилсоор хоёр жилийн нүүр  үзлээ. Бид анх удаа киногоо жилийн өмнө эрт зарлаад, кино театрууддаа захиалгаа өгөөд зохион байгуулалттай хариуцлагатай эхэлсэн. Гэтэл хөл хорионоос болж хойшилсон юм. Одоо үзэгчдэдээ киногоо үзүүлэх л үлдлээ.  

Төгсгөлийн анги ямар байх вэ гэдэг санаагаа  гуравдугаар ангиа хийж байхдаа  бодож олсон.  Туяа, Дөлгөөнөө хоёртойгоо Монгол гэрт  хонох үеэрээ    төгсгөлийн ангийн санаагаа ярилцаж, дотроо төсөөлөөд л.  Манай  хоёр  хөөрч  баярлаад.  Удалгүй зохиолдоо шамдан  орж,  багаа бүрдүүлсэн дээ. 

Ерөнхийдөө багаа бүрдүүлэхээс ажил эхэлдэг. Зохиолоо захиалж, Р.Эмүжин эхний зохиолыг бичиж, найруулагч Л.Бат-Амгалан киноны зохиолыг эцэслэсэн.  Энэ удаа бид “Ariunaa Suri”-г сонгож  жүжигчдийн хувцас  дизайныг гаргасан.  Ажлаа хуваарилаад тал тал  бужигнаж байгаа юм. Одоо бодоход их зоригтой хөдөлсөн  санагддаг. 

Ундармаа-н зураг.

- Киноны  постероос  та гурав баатарын дүрээр эргэн ирсэн байна лээ. Кино зураг авах явцын сонин сайханаас хуваалцаач? 
-Мал, малчин, хүмүүс гээд олныг хамарсан хэсгүүд бий. Сүүлийн өдрийн зурганд олон тооны мал  шаардлагатай боллоо. Багийнхан маань нугтийн хоёр сайхан  хөгшинтэй уулзаж учир байдлаа хэлээд    туслахыг гуйсан. Хөдөөгийн ард түмний сайхан сэтгэл, өв уламжлалаа хадгалсаар байгаа  нь бахархмаар. Зурганд шаардлагатай адуу малыг айл айлаас цуглуулаад, бас олны хэсэгт тоглох хүмүүсийг ч олж өгсөн. 

Хөдөө талд зураг авах  санаснаас амар байгаагүй. Очиход мал нь бэлчээртэй бэлэн гэж бодож байгаа юм. Гэтэл биднийг зураг авалт хийх сургаар  тэндэхийн зарим малчид  "үнээ нэмээрэй, хонио битгий өгөөрэй" гэх зэргээр хүндрэл гарах үе таарсан. Гэхдээ зураг авалтаа амжилттай дуусгаж   ард нь гараад л ирлээ.  

- "Single Ladies"  бол ганц бие эмэгтэйчүүдийн баяртай, гунигтай хөгжилтэй талыг түлхүү харуулдаг. Төгсгөлийн анги өмнөх ангиудаас юугаараа онцлог вэ?  

- Бүх тал дээр шинэчлэлт хийсэн. Дуу, дүрс, өнгө, хувцас, хэрэглэл, орчин, объект, жүжигчдийн тоглолт, шинэ жүжигчид, агуулга, бидний өгөх гэж байгаа утга санаа, цаг хугацаа, багийн хүч гэх мэт бүх зүйл өөрчлөгдсөн. Эхний гурван ангид бид хангалттай хүмүүсээ инээлгэсэн. Харин энэ удаад арай өөр. 

-Үзэгчид их өндөр хүлээлттэй байх шиг байна? 

-Харин тийм. Би бас айгаад л байна. /инээв/ Хүн хүнийг хайрлаж магтах тусам бүр айдаг шиг илүү их хариуцлага ирж байгаа юм шиг санагдаад шөнө ч унтаж чадахгүй нүд минь бүлцийгээд л явж байна даа. 

Ундармаа-н зураг.
 

- Дөлгөөнөө хөдөөгийн залууд дурлаад тэндээ үлдчихсэн. Одоо Ариунсанаа  ханиа олох болов уу? 

- Хамгийн сонирхолтой нь Аригийн асуудлаа хэрхэн шийдвэрлэх л байна. Одоо ярьчихвал сонирхолгүй. Манай үзэгчид өөрсдөө киноноосоо үзвэл амттай шүү дээ. 

- Саяхан жүжигчин Алдармаагийн "Эхиймаа" кино нээлтээ хийлээ. Олон нийтээс  эерэг, сөрөг коммент их авлаа. Харин та ямар дүгнэлттэй үлдсэн бэ? 

- Алдармаа бол уран бүтээлч хүн. Тэвчихийн аргагүй үе  гэж хүнд байна. Алдармаагийн тэр хэцүү газар очсон мэдрэмж, хүүгээ санасан эхийн сэтгэл   энэ киног хийхэд  нөлөөлсөн байх. Манай Алдармаа цайлган, тусч.  Бас их үзэсгэлэнтэй. Киногоороо бусдад тэвчээртэй байгаарай, тэнд битгий очоосой, үр хүүхдээ  бодож үйлдлээ хянаж  байгаарай   гэдэг санааг хэлэхийг хүссэн байсан. Хүмүүсийн яриад байгаа шиг чанаргүй уран бүтээл  биш ээ. 

Инфо Мн-н зураг.

-Хүчирхийллийн асуудал сүүлийн үед хурцаар хөндөгдөж байна. Бид  юу хийж чадах вэ?

- Би “Монголын эмэгтэйчүүдийн холбоо”-ны удирдах зөвлөлд элссэн. Нийгэмд эцэг, эхийн хүчирхийллийн тухай боловсрол маш дутмаг байна. Хэнд итгэх, хэнд итгэж болохгүй гэдгээ мэддэггүй. Хүүхдүүдэд тавих анхаарал сул.  Төрсөн эцэг, өвөө, ах, хойд эцэг гэх мэт гэр бүлийнхэн нь хүчирхийлж байна.

Үүнийг Монголын эмэгтэйчүүдийн холбоо тусгайлан эцэг эхчүүдэд сургалт бэлдэж байгаа. ЕБС-ийн хүүхдүүдэд ч сургалт орно. Хүчирхийлэл гэж юу вэ, хаана хандах ёстой вэ, төрөл бүр дээр нь урьдчилан сэргийлэх арга хэмжээ, дараагийн хуулиар зохицуулагдах ажлуудыг хийж байна. Ер нь үүнийг хүмүүст түгээхээр зорьж байна. Энэ бол бид нарын өдөр болгон шаналах хамгийн хүнд асуудал болчихоод байна.

Би саяхан “Сүүдэр бүү тусга аян”-д нэгдэн лайв хйилээ л дээ. Гэтэл хүчирхийллийн талаар яриад эхэлсэн чинь хүмүүс гараад явчихсан, их харамсалтай.  Нийгэм үнэндээ хүчирхийллийн талаар өөрсдөө ойлгож мэдэхийг хүсэхгүй байна. Хэн хаана тэнэг үйлдэл гаргаж байгааг бол иүү сонирхож сэдэв болгодог.  

- Эцэг эх байх эрхийг хасах нь  шийдэл мөн үү?
- Үнэхээр эцэг, эх шиг нь үүргээ хүлээж чадахгүй бол хасах л хэрэгтэй. Хүүхдийг аюулаас авармаар байна шүү дээ. Харин хамгаалах газрууд хүүхдийг тусгаарлаж, халамжлахдаа  хариуцлагатай үнэнч ажиллах ёстой гэж боддог. 

-Хэдхэн хоногийн 9 настай охин амиа алдсан хэрэг гарлаа. Олон нийтээс амиа алдсан охины  ээжийг нь буруутгах хандлага их байна. Таны бодол?

- Ямар ч тохиолдолд ээж л хамгийн эхэнд арга хэмжээ авах ёстой байсан. Яаж ч болдоггүй ааш аягтай хүмүүс байдаг л даа. Хойд эцэг нь ямар хүн байдаг нь надад төсөөлөгдөөд л байна.

- Цаашдаа ямар уран бүтээл хийе гэсэн зорилго, төлөвлөгөөтэй байна вэ? 
- Монголчууд  цөөхүүлээ мөртлөө хорт хавдрын өвчлөлөөр  дэлхийд  дээгүүрт орсон хэвээр байна. Тиймээс  чадлынхаа хэрээр эрүүл мэндийн боловсрол олгох зорилгоор 20 ангит кино хийж байна. Нийгэмд болж байгаа үйл явдал, өнөөдрийн байгаа байдал, нөхцөл байдлыг манай урлагийнхан соргог хүлээж авах ёстой.

Үүний тулд маш сайн баг хамт олон хэрэгтэй. Манайхан монгол бичиг гэж шуурч байгаад л хаячихдаг. Тэгэхэд бид аль хоёрдугаар сард “Халуут” дууг монгол бичгийн галигаар клип хийчихсэн л байна.Бид ийм юм хийлээ гэж  зарлаагүй ч цагийн аясаар үнэ цэнэ нь мэдэгддэг. Энэ дуу сошиалд өндөр хандалттай явж байна лээ.

Ундармаа-н зураг.

Ярилцсанд баярлалаа. 
Т.Номин 

 

Сэтгэгдэл (2)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
2020 оны 09 сарын 26
188.156.90.19
Zochin

ALIA SALBADAI ODOO BOLIO BOLI.CHAMAIG HEN CH TOOHGUI BAIHAD CHINII UMNUUS ICHIJ BNAA.CHI odoo SHAL HUGSHIRSUN BOLOHOO MEDEHGUI BOL ARD TUMEN HELEED BNA HELEED BNA.

2020 оны 09 сарын 25
103.87.255.66
би

шаал утгагүй юм хийхээ болимоор юм. хий маяг\n