“Сэр сэр салхи” Осакагийн кино наадамд оролцоно

Залуу найруулагч П.Лхагвадуламын бүтээл “Сэр сэр салхи” уран сайхны кино Осакагийн кино наадамд оролцохоор болжээ. Осакагийн кино наадам нь Япон улсын зохион байгуулдаг ижил төрлийн арга хэмжээнүүдээс хамгийн том нь бөгөөд ирэх гуравдугаар сарын 1-10-ны өдрүүдэд болох юм.

Фестивальд 55 кино өрсөлдөж байгаа бөгөөд “Сэр сэр салхи”-иас гадна Малайзын Сун Ж Перумалын “Усан дээрх гал”, Филиппиний Карл Жозеф Папагийн “Найз биш”, Тайванийн Чин Хуа Хуагийн “Яршигтай охин” зэрэг кинонууд байна. Японы уран бүтээлчид тус наадамд киноныхоо нээлтийг хийх тохиолдол их гардаг. Энэ удаа зохион байгуулагч улсаас гурван кино уг фестивалийн үед нээлтээ хийх ажээ.