Волейболын дээд лиг энэ жилээс шинэчилсэн дүрмийн дагуу явагдана

Монголын Волейболын холбооноос энэ жилийн Үндэсний Дээд лиг 11-р сарын 03-нд эхэлж цоо шинэ форматтай зохиогдохоор болсныг мэдээлжээ. Үүнд дараах шинэ дүрмүүдийг гаргасан байна.

Энэ жил эрэгтэй 8, эмэгтэй 8 буюу нийт 16 багтайгаар хамгийн өргөн бүрэлдэхүүтэйгээр 2025-2026 оны лиг эхэлнэ.

Тоглогч бүр "FIVB Play Clean program" гэрчилгээтэй байх, тоглолт наймаалцахаас сэргийлэх тухай цахим курс дүүргэсэн байх, “Хамгаалах цахим сургалт”-д хамрагдсан байх зэрэг шаардлагуудыг тавьсан байна.

Мөн талбай дээр гарах гадаад тоглогчтой холбогдуулан хэд хэдэн шинэчлэл хийжээ. Тодруулбал "Баг бүрд дөрөв хүртэлх гадаад тоглогч байж болно. Ингэхдээ эрэгтэй баг 2 хүртэлх гадаад тоглогч талбайд тоглуулж болох бол эмэгтэй баг гурав хүртэлх гадаад тоглогч талбайд тоглуулж болно гэжээ.

Хамгийн чухал шийдвэр буюу шигшээ цуврал тоглолтын тоо нэмэгдсэн байна. Хагас шигшээ тоглолт 3 хожлоор (Best of 5), Аваргын цуврал 4 хожлоор (Best of 7) шийдэгдэх удаан үргэлжлэх, цуврал тоглолттой Плэй-оффыг үзэгчдэдээ үзүүлэхээр шийдсэн байна.