НҮБ-ын Аюулгүйн зөвлөл өнөөдөр Ормузын хоолойг цэргийн хүчээр нээх эсэх асуудлаар санал хураана

Дэлхийн газрын тосны тээврийн 20 хувь нь дамжин өнгөрдөг Ормузын хоолойг Иран бүслэн хаасантай холбоотойгоор НҮБ-ын Аюулгүйн зөвлөл өнөөдөр санал хураалт явуулахаар болжээ.

Бахрейн улсын санаачилсан уг тогтоолын төсөл нь худалдааны усан онгоцуудыг хамгаалахын тулд “шаардлагатай бүх хамгаалах арга хэмжээ”-г авах эрхийг улс орнуудад олгохыг зорьж буй.

Ормузын хоолойг бүслэн хааснаас болж Саудын Араб тэргүүтэй улсууд ихэд хохирч байгаа бөгөөд газрын тосны үнийн өсөлт дэлхий нийтэд эдийн засгийн хүндрэл учруулж буй. Гэвч өчигдөр болсон хэлэлцүүлгийн үеэр Аюулгүйн зөвлөлийн байнгын гишүүн ОХУ, БНХАУ уг саналыг эсэргүүцэж байгаа нь тогтоол батлагдахгүй байх нөхцлийг бүрдүүлж буй юм.

Аюулгүйн зөвлөлийн тогтоол батлагдахын тулд дор хаяж есөн гишүүн дэмжиж, байнгын таван гишүүний хэн нь ч хориг тавихгүй байх шаардлагатай.