"Хүлээн зөвшөөрөх нь эхлэл" уриан дор Аутизмыг таниулах өдөрлөг

Жил бүрийн 4 дүгээр сарын 2-ны өдөр дэлхий нийтээр Аутизмыг таниулах өдөр тохиодог. Энэ өдрийг угтан “Хүлээн зөвшөөрөх нь эхлэл” уриан дор аутизмын хүрээний эмгэгтэй хүүхдүүдийг ойлгох, хүндэтгэх, тэдний онцлогт нийцсэн дэмжлэгийг нэмэгдүүлэх зорилготой өдөрлөгийг зохион байгуулах гэж байна.

Орчин үед аутизмын талаарх ойлголт нэмэгдэж байгаа ч бодит амьдрал дээр хүлээн зөвшөөрөх, дэмжих орчин хангалттай бүрдээгүй хэвээр байна. Иймээс энэхүү өдөрлөг нь зөвхөн мэдээлэл түгээх бус, нийгмийн хандлагыг өөрчлөх, “өөр байдал”-ыг ойлгож, хүлээн зөвшөөрөхөөс эхэлдэг хөгжлийн үндэс суурийг бүрдүүлэхэд чиглэж байна.

Тус өдөрлөгийг “Ээлтэй Ертөнц” төрийн бус байгууллага санаачлан, Хөгжлийн бэрхшээлтэй хүний хөгжлийн ерөнхий газартай хамтран зохион байгуулж байгаа бөгөөд аутизмын чиглэлээр ажиллаж буй дотоод, гадаадын 12 илтгэгч бүхий олон салбарын мэргэжилтнүүдийн баг оролцоно.

Энэхүү багт:

• тэгш хамрагдах боловсролын судлаач, доктор профессор
• хөдөлгөөн засал, хөдөлмөр засал, хэл заслын мэргэжилтнүүд
• аутизмтай хүүхэдтэй ажилладаг боловсролын багш нар
• хөгжлийн бэрхшээлтэй хүүхэдтэй ажилладаг практик үйлчилгээний баг
• олон улсын туршлагатай сургагч, сайн дурын ажилтнууд зэрэг олон чиглэлийн төлөөлөл багтаж байна.

Өөрөөр хэлбэл, аутизмыг зөвхөн нэг салбарын асуудал биш, харин боловсрол, эрүүл мэнд, нийгмийн хамгаалал, гэр бүл, олон нийтийн хамтын оролцоонд суурилсан цогц асуудал гэдгийг энэхүү өдөрлөг онцлон харуулах юм.

Өдөрлөгийн хүрээнд:

• Аутизмтай хүүхдийн үнэлгээ, оношлогоо, эцэг эхийн оролцоо
• Харилцаа, мэдрэхүй, зан үйлийн дэмжлэгийн арга зүй
• Хөдөлмөр заслын үр нөлөө, кейс судалгаа
• Спорт өрөлт (аяга өрөх спорт)-өөр хөгжүүлэх туршлага
• Тэгш хамрагдах боловсрол, хүүхэд бүрт тохирсон дэмжлэг
• Хэл заслын эмчилгээний арга зүй
• Асран хамгаалагчдын өрхийн үйлдвэрлэл, төрийн дэмжлэг
• Төсөл боловсруулах практик зөвлөмж
• 18+ насны оюуны бэрхшээлтэй иргэдийн хөдөлмөрт бэлтгэх, ажил эрхлэлтийн туршлага
• Ажлын байранд дасгалжуулагчийн дэмжлэг.

“Хүлээн зөвшөөрөх нь эхлэл” уриа нь аутизмтай хүүхдүүдийг өөрчлөхөөс илүүтэй тэднийг ойлгож, орчныг нь дасан зохицуулах, боломжийг нь нээх хандлагыг илэрхийлж байна. Энэ нь салбар хоорондын хамтын ажиллагаанд суурилсан бодит өөрчлөлтийн эхлэл юм.

Өдөрлөгийн дэлгэрэнгүй мэдээлэл: Огноо: 2026 оны 4 дүгээр сарын 2 Цаг: 09:00 Байршил: Хөгжлийн бэрхшээлтэй хүний хөгжлийн ерөнхий газар Холбоо барих: 91813060, 85154142

Аутизмтай хүүхэд бүр өөрийн онцлог, давуу талтай. Тэднийг ойлгож, хүлээн зөвшөөрөх нь хөгжлийн эхлэл юм.

Зохион байгуулагч: “Ээлтэй Ертөнц” ТББ Хамтрагч: Хөгжлийн бэрхшээлтэй хүний хөгжлийн ерөнхий газар