АИ-92-оос бусад шатахууны үнийг литр тутамд 300-350 төгрөгөөр нэмнэ

Үнийн зөвлөл хуралдаад АИ-92-оос бусад шатахууны үнийг литр тутамд 300-350 төгрөгөөр нэмэх шийдвэр гаргажээ. АҮЭБ-ийн дэд сайд Б.Энхтүвшин энэ талаар мэдэгдлээ.

Тэрбээр" Дэлхий дахинд үүсээд байгаа нөхцөл байдалтай холбоотойгоор манай улс шатахууны үнэд өөрчлөлт оруулахаар боллоо. ОХУ-аас дөрөвдүгээр сард нийлүүлэх шатахууны хувьд АИ-92 бензиний үнийг тогтвортой хадгалах ч бусад төрлийн түлшний үнийг тодорхой хэмжээгээр нэмэх шийдвэр гаргасан. Үүнтэй холбоотойгоор Үнийн зөвлөлөөс АИ-92 шатахуунаас бусад төрлийн бүтээгдэхүүнийг литр тутамд 300-350 төгрөгөөр нэмэх зөвлөмжийг аж ахуйн нэгжүүдэд хүргүүлсэн. Цаашид зах зээлийн нөхцөл байдлаас шалтгаалан шатахууны үнэ литр тутамд 900-2000 төгрөгөөр нэмэгдүүлэх тооцооллыг хийж байна" гэлээ.

Өнөөдрийн байдлаар улсын хэмжээнд АИ-92 шатахууны 90.1 мянган тонн буюу 42 хоног, АИ-95 шатахуун 6.4 мянган тонн буюу 72 хоног, дизелийн түлш 116 мянган тонн буюу 29 хоногийн нөөцтэй байгааг сайд дуулгасан юм.