Л.Гүндалайн эхнэр Л.Аззаяа улс төрд орлоо

Улсын дээд шүүхийн нийт шүүгчдийн өнөөдрийн хуралдаанаар иргэн Л.Аззаяагийн үүсгэн байгуулсан Ард түмний хүч намыг улсын бүртгэлд бүртгэжээ. Тэрбээр өмнө нь намаа бүртгүүлэх хүсэлтийг нэг бус удаа өгсөн ч УДШ татгалзаж байсан аж. Харин энэ удаа намынхаа “Ард түмнээ хайрлая” нэрийг Ард түмний хүч болгож өөрчилснөөр өнөөдөр ийнхүү бүртгүүлсэн байна.

Л.Аззаяа нь УИХ-ын гишүүн асан Л.Гүндалайн эхнэр бөгөөд өнөөдрөөс ийнхүү намын дарга болох тохироо нь бүрдэж, улс төр рүү орж байна.  

УДШ-ийн нийт шүүгчдийн өнөөдрийн хурлаар дээрхээс гадна:

1. Улсын Их Хурлын гишүүн Ц.Мөнх-Оргилоос албан бичгээр ирүүлсэн Монгол Улсын Үндсэн хуулийн цэцийн тухай болон Үндсэн хуулийн цэцэд маргаан хянан шийдвэрлэх ажиллагааны тухай хууль (Шинэчилсэн найруулга)-ийн урьдчилсан төслийг хэлэлцэж, холбогдох саналыг албан бичгээр хүргүүлэхээр тогтов. 
2. Иргэний хөдөлгөөний намын даргаар Ө.Баярааг, намын хаягийн мэдээлэл өөрчлөгдсөнийг тус тус бүртгүүлэхээр ирүүлсэн Ө.Баяраагийн өргөдлийг хэлэлцээд холбогдох хууль болон тус намын дүрэмд нийцсэн гэж үзэж, бүртгэхээр шийдвэрлэлээ.