КАЗАНЬ: В.Путин БРИКС-ын чуулганд очсон удирдагчдад хэлсэн хундаганы үгдээ юуг онцлов

ОХУ-ын Казаньд болсон БРИКС-ын чуулга уулзалт өргөтгөсөн бүрэлдэхүүнтэй буюу гишүүн есөн орноос гадна 27, нийт 36 улсын удирдагчдыг цуглуулсан том үйл явдал болсон билээ. Энэхүү уулзалтын хүндэтгэлийн оройн зоог дээр байгууллагыг энэ жил даргалагч, чуулга уулзалтыг зохион байгуулагч ОХУ-ын Ерөнхийлөгч В.Путин хундаганы үг хэлжээ. 

Тэрбээр хэлсэн үгдээ "Хүндэт нөхөд өө! Өнөөдөр энд хүрэлцэн ирсэн та бүхэнд талархал илэрхийлж, ард түмнийхээ хөгжил цэцэглэлт, хамтын ажиллагааг бэхжүүлэх, цугларсан хүн бүрийн эрүүл мэндийн төлөө хундага өргөе" хэмээн онцолжээ. 

БРИКС-ийн энэ удаагийн чуулганы ач холбогдлын тухайд, ОХУ-ын Ерөнхийлөгчийн туслах Сергей Станкевич "Өмнө нь албан ёсны шийдвэр гаргадаггүй, зөвхөн албан бус уулзалт, шийдэл, санал солилцдог /АСЕМ шиг/ байсан бол одоо байдал өөрчлөгдлөө. Бидний өмнө одоо худалдааны төлбөрийн хэрэгсэл болон мөнгөний нөөцийн хувьд ам.долларын ноёрхлоос гарах зорилт тулгарч байна" гэсэн нь оносон тодорхойлолт болжээ. Өөрөөр хэлбэл, нэгдэл нь албан ёсны шийдвэр гаргадаг болж байгаа бөгөөд энэ нь урьд өмнөх чуулгануудаар хангалттай яригдсан ам.долларын ноёрхлыг сааруулах чигт төвлөрөх нь тодорхой болж байна.    

БРИКС-ийн дээд хэмжээний уулзалтад Хятад, Энэтхэг, Өмнөд Африк, Иран, АНЭУ, Боливи, Египет, Турк, Беларусь, Казахстан, Конго, Азербайжан, Палестин, Лаос, Армени, Этиоп, Малайз, Серби, Киргиз зэрэг улсууд оролцсоны дотор манай улс мөн багтаж байгаа юм.