Хуурамч шатахууны бизнесийг "атгадаг" гэх Э.Жононбаярын “Трафигура Монголиа” толгой компаниасаа 1.1 тэрбум ам.доллар ЗАЛИЛСАН уу

"Хуурамч шатахууны бизнес хийдэг" гэдгээрээ танигдсан "Трафигура Монголиа" компанийн эзэн Э.Жононбаяр тэрбум гаруй ам.долларын хохиролтой олон улсын санхүүгийн гэмт хэрэгт холбогдох нь гарцаагүй болжээ. 

Сингапурт төвтэй "Трафигура" үндэстэн дамнасан корпораци санхүүдээ аудит оруулсны дүнд Монголд газрын тосны бүтээгдэхүүн нийлүүлэх бизнесийн үйл ажиллагаанаасаа 1.1 тэрбум ам.долларын зөрчил илрүүлснээ зарлалаа. 

Тодруулбал, толгой компаниас илүү мөнгө нэхэмжлэх, хугацаа хэтэрсэн авлагыг зориудаар нуун дарагдуулах гэх мэт ноцтой гэмт хэрэг үйлдэгдсэнийг тогтоосон байна. 

Тус компани уг гэмт хэргийг үйлдэгдсэн байж болзошгүй талаарх таамаг мэдэгдлийг өнгөрсөн хоёрдугаар сард анх гаргаж байсан бол наймдугаар сард хийсэн мэдэгдэлдээ хохирлын хэмжээ хэдэн зуун зуун сая ам.долларт хүрсэн гэж байв.

Харин энэ удаад хохирлын хэмжээ тэрбум ам.доллараас давсан болохыг тогтоож, албан ёсны цахим хуудастаа өчигдөр нийтэлсэн байна. 

Мэдэгдэлд, “Санхүүгийн шалгалтын дүнд уг гэмт хэрэг таван жилийн турш үйлдэгдэж ирснийг тогтоосон гээд илэрсэн 1.1 тэрбум ам.долларын ихэнх нь Монгол дахь үндсэн түшид хамаатай гэжээ. Өөрөөр хэлбэл, нэр дурдаагүй ч буруутай этгээдүүд нь "Трафигура Монголиа" компанийн эзэн Эрдэнэсүрэн, түүний хүү Жононбаяр нар гэдгийг мэдэгдлээрээ хэлж байгаа юм. 

Түүнчлэн, гэмт хэрэг таван жилийн хугацаанд үйлдэгдсэнийг тогтоосон ч шалгалт цааш үргэлжилж байгаа гэснээс үзвэл санхүүгийн шалгалтаа цаг хугацааны хувьд хойноос урагш нь шалгаж байгаа бололтой. 

Өөрөөр хэлбэл, шалгалт үргэлжлэх тусам хохирлын хэмжээ өсөх магадлалтай гэсэн үг юм.
 "Трафигура Монголия" компани 2012 онд Монголд бизнесээ эхлүүлж байсан юм. 

Компанийн гүйцэтгэх захирал Жереми Уэйр хэлэхдээ: "Бид Монголын газрын тосны бизнест зүй бус үйлдэл гаргасанд маш их сэтгэл дундуур байна. Трафигурад буруутай үйлдэл хийх газар байхгүй бөгөөд бид холбогдох хүмүүст сахилгын арга хэмжээг авч байна.

 Түүнчлэн, нарийвчилсан дүгнэлт гарсны дараа энэ асуудал нь зөвхөн Монголтой холбоотой асуудал учраас бүрэн тусгаарлаж, бусад үйл ажиллагаанд нөлөөлөхгүйгээр холбогдох арга хэмжээг авна" гэжээ. 

Ингэснээр хуурамч шатахууны бизнесийн нууц ноёнтон, хууль хяналтын байгууллагыг баздаг хэмжээгүй эрх мэдэлтэй Э.Жононбаяр гэгч нууц ноёнтны ирээдүй тун ч бүрхэг болох төдийгүй, улс орны нэр хүндэд ч асар халтай үйл явдал болж байж магадгүй байна.

 Учир нь, Э.Жононбаяр нь Монгол дахь бизнесээ хамгаалахын тулд Үндсэн хуулийн цэц, УИХ-аар өөрийн талд шийдвэр гаргуулан хуурамч шатахууны бизнесээ аварч үлдэж байсан түүхтэй нэгэн бөгөөд түүний хууль бус үйлдлүүд олон улсад дэлгэгдэхтэй зэрэгцээд Монголын төрийн авлиагад автсан, чадамжгүй байдал мөн дэлгэгдэж, олон улсад шившгээ тарих бололтой.

 Учир нь, Э.Жононбаяр нь компанийн хөрөнгийг хувьдаа завшиж төрсөн эх Д.Эрдэнэсүрэн, нагац эгч, Д.Эрдэнэтуяа, Д.Эрдэнэтуул, ах Д.Төмөртогоо болон бусад хамааралтай бүхий хүмүүсийн нэр дээр керосин, нафта, алкилат, болон нефтийн бүтээгдэхүүн импортлох, жижиглэнгээр худалдаалах чиглэлээр үйл ажиллагаа явуулдаг “Трансгайд сервис” ХХК, “Хөрс ойл” ХХК, “Петро ойл трейд” ХХК, “Даймонд ойл” ХХК, “Зуун найм ойл” ХХК, “Аргал ойл” ХХК, “Трансгайд терминал” ХХК, “Ист ойл” ХХК, “Тод петролиум” ХХК, “Мазаалай петролиум” ХХК, “Грөвт сольюшн” ХХК гэх зэрэг нийт 20 гаруй компанийг бүртгүүлсэн, тэдний ард Ерөнхий сайд асан С.Баяр, Эдийн засгийн хөгжлийн сайд асан Ч.Хүрэлбаатар, Гэр бүл, Хөдөлмөр нийгмийн хамгааллын сайд Л.Энх-Амгалан, Улсын Их хурлын гишүүн Ц.Цэрэнпунцаг, Р.Бадамдамдин, Хүнс, хөдөө аж ахуй, хөнгөн үйлдвэрийн сайд асан Т.Бадамжунай нарын нөлөө бүхий хүмүүс байдаг гэдэг мэдээлэл хэвлэлээр хэдэнтээ гарч байв.

 Компанийн зүгээс гаргасан дээрх мэдэгдэл Ройтерс, Блүүмберг зэрэг дэлхийд нэр хүндтэй агентлагуудаар цацагдсан бөгөөд компанийн зүгээс түншүүд, олон улс дахь нэр хүнддээ ихэд санаа зовж байгаа нь тодорхой байгаа юм.

"Трафигура Монголиа" компанийн “ЭЗЭД” болох Д. Эрдэнэсүрэн, түүний хүү Э.Жононбаяр гэж хэн бэ

Сингапурт төвтэй “Трафигура” компанийг Монголд Д.Эрдэнэсүрэн түүний хүү Э.Жононбаяр нар төлөөлдөг. 

Д.Эрдэнэсүрэн гэх эмэгтэйн хувьд гаалийн жирийн нэг байцаагчаас хэдхэн жилийн дотор тэрбумтан болж, монголын хамгийн үнэтэй “Асем вилла” хотхонд амьдрах болсон аж. 

Стратегийн гол бүтээгдэхүүний зах зээлийн 4/1 хувийг дангаар ноёрхож буй “Трафигура” нэр бүхий улстөрчидтэй үгсэн хуйвалдаж, эрх ашгаараа сүлбэлдэлж өнөөдрийн амжилтанд хүрч чадсан гэдгийг төрийн ордноос парламентийн гишүүд ч ярьж байв.

Мөн Монголд олон жил хуурамч түлш, шатахуун их хэмжээгээр борлуулж үүнээс болж иргэдийн машины хөдөлгүүр доголдож, засвар, үйлчилгээнд нь олон сая төгрөг зарцуулан хохирч байгаа талаар хэдэн жилийн өмнө УИХ-ын гишүүн Д.Пүрэвдорж, Ц.Анандбазар нар мэдээлж байлаа. Гэхдээ тэдэнд ч өөрсдийн эрх ашиг байсныг энд дурдах зүйтэй болов уу. 

“Трафигура”-ийн Монгол дахь салбарыг Э.Жононбаяр гэх залуу хариуцдаг бөгөөд түүний нэр дээр болон хамаарал бүхий хүмүүс болох ээж, нагац ах, нагац эгч, хүргэн ах нарын нэр дээр 30 орчим компани бүртгэлтэй байдаг ба зарим компаниар нь дамжуулж мөнгө угаасан байх сэжүүрүүд ч бий юм. Дараагийн дугаар уг асуудлыг дэлгэрэнгүй задалж хүргэх болно.