''Феличита'' дууны ард нуугдсан ХЭМЖЭЭЛШГҮЙ ЗОВЛОНГИЙН ТҮҮХ

''Феличита'' хэмээх Итали үгийг орчуулбал ''Аз жаргал'' болох буюу.

Монголын сонсогчдод ''Феличита'' дуугаараа танигдсан Италийн дуучин Аль Бано болон түүний үзэсгэлэнт эхнэр Ромина Пауэл нарыг тайз дэлгэцнээс инээд цацруулсан байдалтайгаар л хардагаас биш, тэдний амьдралд 27 жилийн турш туссан хар сүүдрийг мэдэх хүмүүс ховор байдаг нь харамсалтай.

Италийн дуучин Аль Бано 24 насандаа анх 16-хан настай, үзэсгэлэн гоо охиныг харж анхны харцаар дурласан нь ирээдүйн эхнэр нь болох Ромина Пауэл байв. ''Наранд'' буюу ''Nel Sole'' кинонд Роминагийн эцэг эх дүр бүтээсэн бөгөөд тэднийг дагаж ирээд байсан охин ийнхүү Италийн алдарт дуучинтай хайр сэтгэлийн холбоотой болох эхлэл тавигдав. Тэд 1970 онд хуримаа хийж, ердөө дөрөвхөн сарын дараа анхны охин болох Елинаг төрүүлсэн юм. 

Баян чинээлэг айлаас гаралтай, тансаг амьдралын хэв маягтай Америк бүсгүйг урлагт хөлөө олоx гэж ядаж яваа Италийн залуу дуучинтай гэрлэнэ гэхэд эцэг эх нь анхандаа эсэргүүцэж байв. Гэсэн ч хосуудын бие биенээ гэх хайр сэтгэл ямар ч бэрхшээлийг даван гарах чадалтай байлаа. 

Хосууд нэг гэрт орж, охинтой болж, тэмцээнд уралдаан, тоглолтод хослон дуулдаг болов. Тэд дараагийн хорин жилд нэр алдартай болж, олонд танигдав. Анхны охин нь 24 нас хүрэх үед тэдний амьдралд аймшигт зүйл тохиолдож, аминаас илүү хайртай Елина нь алга болжээ.

Тухайн үед 24 настай байсан Елина охин хичээл, сургуулийнхаа хажуугаар дэлхийг тойрон үүргэвчтэй аялал хийх мөрөөдөл тээн, АНУ-г зорьжээ. 1993 оны арван хоёрдугаар сарын 27-ны өдөр Нью Орлеанс орох автобусанд суугаад үүнээс цааш ор сураггүй алга болсон билээ.

Охины алга болсон хэрэг одоог хүртэл учир битүүлэг хэвээр байна. Елинаг эцгийнх нь хүсэлтээр 1993.12.31-нд нас барсан хэмээн зарласан бөгөөд, олон жилийн турш өөрийнх нь охины сургийг гаргах гэсэн хуурамч мэдээллүүд, өөрийнх нь охины дүр эсгэгчдээс залхаж цөхөрсөн эцэг нь яах аргагүй ийн зарлуулжээ.

Елинаг алга болсноос хэдэн жилийн дараа 1990-ээд оны сүүлээр хосууд саллаа. Хайрын бэлгэ тэмдэг гэж хэлж болохуйц дуучид салсан нь дэлхий нийтийг гайхшруулав. 

Елина хамгийн сүүлд ''Би усанд байх тавилантай'' гэж хэлээд Миссисипи голруу үсэрсэн гэх батлагдаагүй эх сурвалжийн яриа байдаг ч түүний амьд үхсэн эсэх одоо ч тодорхой болоогүй.

Охиноо харамсалтайгаар алдсан эцэг эхийн амьдрал орвонгоороо өөрчлөгдөв. Хосууд салж, тус тусын амьдралыг хөөх болсон бөгөөд Аль Бано удалгүй нэгэн жүжигчин бүсгүйтэй гэрлэж хоёр хүүхэдтэй болжээ.

Роминагийн хувьд хувийн амьдралаа хэвлэлийнхнээс ихэд нууцалсан байна. 

2014 онд хосууд урлагийн тайзнаа эргэн ирэв. Италийн хамгийн алдартай  Festival di Sanremo-д оролцож, дуулсан байна. Тэднийг эргэн нийлсэн гэх яриа гарсан ч  дуучдын төлөөлөгчид уг мэдээллийг үгүйсгээд байгаа юм.