Ч.Ундрам: Сэлэнгэ аймагт эрчим хүч, хиймэл оюун ухааны дата төвийн нэгдсэн цогцолбор байгуулах төслийг эхлүүллээ

Сэлэнгэ аймгийн Мандал суманд эрчим хүч, дижитал дэд бүтцийн нэгдсэн цогцолбор байгуулах томоохон төслийг хэрэгжүүлэх эхний алхам хийсэн талаар УИХ-ын гишүүн Ч.Ундрам мэдээллээ.

Тухайлбал өнөөдөр /2026.11.02/ олон улсын NOVVA Group компанийн үүсгэн байгуулагч, гүйцэтгэх захирал Стивен Лиу болон Сэлэнгэ аймгийн Засаг дарга Н.Лхагвадорж нар Төсөл хөгжүүлэх гэрээнд гарын үсэг зурж, хамтын ажиллагаагаа албан ёсоор эхлүүлж байгаа ажээ.

Төслийн хүрээнд:

• 150 МВт хүчин чадалтай дулаан, цахилгаан хослон үйлдвэрлэх станц

• 80 МВт хүртэлх IT ачаалал бүхий хиймэл оюун ухааны дата төв

• 100 МВт хүчин чадалтай нарны цахилгаан станц

• 60 МВт чадал, 200 МВт·ц багтаамжтай эрчим хүч хуримтлуулах батарейн систем байгуулахаар төлөвлөж байна.

Энэ талаар УИХ-ын гишүүн Ч.Ундрам “Сэлэнгэчүүдийн дулаан, цахилгааны найдвартай хангамжийг сайжруулж, агаарын бохирдлыг бууруулах, улмаар орчин үеийн дижитал дэд бүтцийг хөгжүүлэхэд чиглэж байна.

Мөн орон нутагт шинэ ажлын байр бий болгох, залуучуудыг өндөр технологийн салбарт мэргэшүүлэх, бүс нутгийн эдийн засгийн хөгжлийг дэмжих чухал ач холбогдолтой.

Энэхүү хамтын ажиллагааны эхлэл 2026 оны аравдугаар сард NOVVA Group-ийн төлөөлөлтэй хийсэн уулзалтаар тавигдаж байсан бол өнөөдөр бодит төслийн хөгжүүлэлтийн шатанд шилжиж байгаад баяртай байна.

Сэлэнгэ аймаг хөдөө аж ахуйн түшиц бүс төдийгүй эрчим хүч, технологи, инновацын хөгжлийн шинэ төв болох өргөн боломжтой.

Төслийг амжилттай хэрэгжүүлж, Сэлэнгэчүүдийн амьдралын чанар, орон нутгийн хөгжилд бодит үр өгөөж авчрахын төлөө хамтран ажиллах болно” хэмээлээ.