Төв банк мөнгөний зөв бодлого хэрэгжүүлж чадахгүй байна

2020 оны 03 сарын 31

     Банкны салбарын эрүүл бус үзэгдэл, зээлийн хүүгийн хэт өндөр түвшин, түүнээс улбаатай эдийн засгийн олон сөрөг үр дагаврыг төв банкнаас шалтгаалж байна гэж үзэх хүн олон. УИХ, Засгийн газраас шууд хамааралгүй байж мөнгөний бодлогыг зохистой хэрэгжүүлэх үүрэгтэй Монголбанк нийгэм, цаг үеийн байдлыг бодитоор мэдэрч, оновчтой, зоригтой шийдвэр гаргаж ажиллахгүй байгаа талаарх эдийн засагчдын илэрхийлсэн байр суурийг тоймлон хүргэж байна.

САНХҮҮГИЙН ШИНЖЭЭЧ Д.АНГАР: МОНГОЛБАНКНЫХАН ӨӨРСДИЙН ББСБ-УУДААР АШИГ ОЛДОГ УЧРААС ХҮҮ БУУРУУЛАХГҮЙ БАЙНА

     Манай Монголбанкныхан Бодлогын хүүг хүчээр, зохиомлоор өндөр байлгадаг нэг л том шалтгаан байдаг. Сайд, дарга нарынхаа банкин дахь хадгаламжийн хүүг өндөр байлгах, өөрсдийнхөө ББСБ-уудын ашгийг нэмэгдүүлэх! Ердөө л энэ. Арай л гомдмоор шүү! Монголбанк бодлогын хүүгээ гурван хувь болгосноор банкууд хадгаламжийн хүүгээ бууруулж эхлэнэ. Одоо зарласан хадгаламжийн хүү 13 хувь, тусгай нөхцөлт нь 15-16% байгаа бол бодлогын хүү буурснаар энгийн хадгаламжийн хүү нэг оронтой тоонд тухайлбал жилийн 6-8 хувь болж ирнэ. Ингэж байж л банкуудад зээлийн хүүгээ буулгах, зээлийн төлбөрийг хойшлуулах орон зай гарч ирэх юм. Зээлийн хүү жилийн 10-12 хувь хавьцаа болж ирнэ. Үүнийг л иргэд, аж ахуйн нэгжүүд хүсээд байгаа юм шүү дээ. Хадгаламжийн хүү буурснаар төгрөг гадагшлах уу? Гадаадын бүх зах зээл өөрсдөө хямралтай, өгөөж нь хасахтай байна. Тухайлбал Америк, Европ, Азийн ямар ч хувьцаа эсвэл бонд авсан байлаа гэхэд мөнгөө алдах магадлал маш их байна. Тиймээс төгрөг гадагшлахгүй! Яг үнэндээ улс даяар хэрүүлийн бузар дэлгэрүүлж буй нь Монголбанк юм. Бодлогын хүүгээ цаг хугацаанд нь эрс буулгачихсан бол улсаараа ийм байдалд орохгүй байлаа. Сүүлдээ бүр Ерөнхий сайд болон банкуудыг хонь чоно болтол нь талцууллаа. Ард иргэд ч банкуудыг маш ихээр үзэн ядаж эхлэв. Энэ чигээрээ явбал Монголчууд Манжийн хүүлэгчдийн зээлийн дэвтрийг шатааж өрнөөсөө салж байсантай адил иргэд болон банкуудын хооронд ч маш том хэмжээний үл ойлголцол гарахыг ч үгүйсгэхгүй. Монголбанк өөрөө хөшигний цаана нуугдаж улс даяар бужигнаан, үл ойлголцол өрнүүлж болохгүй ээ!!! Компанийн Засаглалийн Үндэсний Зөвлөлийн дарга Д.Ганбаяр: Төв банк улс төрөөс хараат байна Төв банк мөнгө хэвлэх эдийн засгийн биш улс төрийн шийдвэрээ больчих. Улс төрөөс хараат бус байх гэж хамтын удирдлага бүхий гадны жишиг Удирдах зөвлөлтэй байж нухацтай хэлэлцэж шийддэг бхгүй бол монголбанк нэг хүний хэлснээр хийгээд байж болохгүй. Төв банк нь эрх баригчдын захиалгаар мөнгө хэвлэж улс төрөөс хараат бус байх зарчмаа алдчаад байхад зах зээлийн либерал бодлого үйлчлэхгүй. Үүнийг том зургаар харж тогтолцоог шинэчлэх цаг нь иржээ.

МҮХАҮТ-ИЙН ЕРӨНХИЙЛӨГЧ, УИХ-ЫН ГИШҮҮН АСАН С.ДЭМБЭРЭЛ: ЭРҮҮЛ ӨРСӨЛДӨӨН БИЙ БОЛГОХ ХЭРЭГТЭЙ

     Банкны реформ гэж яг юуг хэлж буйгаа эхлээд тодорхой ойлгож тайлбарлах хэрэгтэй. Банкны реформ хийгдэх эрх зүйн орчин нь бүрдсэн. Гол нь одоо Төв банкныхаа бие даасан хараат бус байдлыг жинхэнэ утгаар нь бий болгох, арилжааны банкууд, ББСБ-ын эрүүл өрсөлдөөний орчныг бий болгох шаардлагатай.

 

 

 

 

ЭДИЙН ЗАСАГЧ Ө.ГАНЗОРИГ: БОДЛОГЫН ХҮҮГ 1 ХУВИАР БУУЛГААД ЭЕРЭГ НӨЛӨӨ ГАРАХГҮЙ

     Эхлээд улс орон эдийн засгийн маш хүнд нөхцөл, долларын өрийн дарамтанд байгааг харгалзахгүйгээр, сэтгэлийн хөөрөлд автаж нүүрсний экспортоо сар шахам хаасан. Үүнээс болж манай улс маш чухал үед 200 гаруй сая долларын орлогоо алдчихлаа. Одоо Хятадын талаас дэлхийг хамарч байгаа эдийн засгийн аюултай уялдан нүүрсний эрэлт хумигдаж эхэлбэл (эхлэх нь бараг ойлгомжтой болсон) бидний нөхцөл байдалд муугаар нөлөөлнө. Монголбанкны зүгээс бодлогын хүүг 1 хувиар буулгасан нь эдийн засагт эерэг нөлөө үзүүлэхгүй гэж би хувьдаа үзэж байна. Учир нь нэг талаас бодлогын хүүгийн нөлөө угаасаа 6-9 сараар хоцорч гардаг.

 

ЭДИЙН ЗАСГИЙН УХААНЫ ДОКТОР(PHD) Р.ДАВААДОРЖ: МӨНГӨ ХҮҮЛЭЛТИЙН ЭСРЭГ ХУУЛЬ ГУРВАН ЖИЛ ГАЦАЖ БАЙНА

     Монголын банк санхүүгийн салбарт "мөнгө хүүлэх" бохир схем байгаа талаар анх гурван жилийн өмнө ярихад ихэд дургүйцэж байсан сан. Одоо хүн бүр ярьдаг болж. УИХ гишүүн С.Эрдэнэ санаачилж өргөн барьсан "Мөнгө хүүлэлт банкны хүүг хязгаарлах" хууль гурван жил УИХ  дээр гацаж байна.

 

     Нэмэлт мэдээлэл: Олон улсын Төв банкууд сүүлийн үед дэлхийг хамарсан цар тахал хийгээд эдийн засгийн онцгой нөхцөл байдлыг харгалзан Мөнгөний бодлогын зоримог шийдвэрүүд гаргаж байгаа. Сүүлийн сар орчмын хугацаанд л гэхэд Ази, Европын 40 орчим төв банк бодлогын хүүгээ эрс /1 болон хасах хувь хүртэл/ бууруулж, үнэт цаас худалдан авах, нөөцийн дэмжлэг үзүүлэх зэрэг шийдэмгий арга хэмжээ аваад байгаа юм.

Сэтгэгдэл (1)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
2020 оны 03 сарын 31
103.57.95.226
Иргэн

Маш яаралтай реформ хийх хэрэгтэй байнаа.