Онцгой комиссоос гарсан ОНЦЛОХ шийдвэрүүд 

2020 оны 02 сарын 11

Шинэ коронавирустэй холбоотой асуудлаар Улсын онцгой комиссын өчигдрийн хуралдаанаар  гаргасан ОНЦЛОХ шийдвэрээс танилцуулъя. 

ЭМНЭЛЭГ, ЭМНЭЛГИЙН АЖИЛТНУУДАА ХАМГААЛАХ ХЭРЭГСЭЛ, ЭМИЙН ХЭРЭГСЛЭЭР ХАНГАНА 

Шинэ коронавирусийн болзошгүй эрсдэлээс хүн амыг урьдчилан сэргийлэх бэлтгэл, бэлэн байдлыг хангах зорилгоор эрүүл мэндийн болон бусад салбарт, төрийн байгууллагын алба хаагчдад нэн хэрэгтэй байгаа эм, эмнэлгийн хэрэгсэл, тоног төхөөрөмж, хувийн хамгаалах хэрэгсэл, оношлуур, ариутгал халдваргүйтлийн бодис худалдан авах нөөц бүрдүүлэхэд шаардагдах хөрөнгийг 2020 оны батлагдсан төсөвт зохицуулалт хийх замаар шийдвэрлэх эрхийг төсвийн ерөнхийлөн захирагч нарт олгох үүргийг Сангийн сайд Ч.Хүрэлбаатарт олголоо.

ЦЭРГИЙН ГОСПИТАЛИЙГ ЭХНИЙ ЭЭЛЖИНД АШИГЛАНА 

Сангийн сайд Ч.Хүрэлбаатар, Эрүүл мэндийн сайд Д.Сарангэрэл нарт БНХАУ-д зорчоод гуравдагч орноор дамжин Монголд  ирж буй хүмүүст онцгой анхаарал хандуулж, мэргэжил арга зүйн зөвлөгөө өгч ажиллах. Мөн коронавирусийн халдварын сэжиг илэрсэн тохиолдолд нийслэлийн хэмжээнд ХӨСҮТ, Цэргийн төв эмнэлэг, “Асралт мед”, ОБЕГ-ын харьяа Давтан сургалт, сэргээн заслын төвийг тусгайлан бэлтгэж, бэлэн байдлыг хангаж ажиллуулах. Хилийн бүсэд байрлах Замын-Үүдийн 100 ортой, Сайншандын 50 ортой эмнэлгийн барилгын ажил дууссан ч, гэрээ байгуулаагүй, төсөвт тусгагдсан санхүүжилтийг олгоогүй ашиглалтад хүлээж аваагүй байгаа. Иймд коронавирусийн халдвараас урьдчилан сэргийлэх, улсын хилээр нэвтэрч байгаа хүмүүсээс өвчний сэжигтэй тохиолдол илэрсэн тохиолдолд түр тусгаарлах зорилгоор дээрх эмнэлгүүдийн гэрээг байгуулж, төсөвт тусгагдсан санхүүжилтийг олгож, Улсын онцгой комисст танилцуулахаар болов. 

НҮҮРС ТЭЭВЭРЛЭЛТИЙГ ТҮР ЗОГСООЛОО 


Өмнөговь аймгийн Ханбогд сумын Гашуун сухайт, Ганц мод, Гурвантэс сумын Шивээ хүрэн хилийн боомтуудаар уул уурхайн түүхий эд тээвэрлэлтийг түр хугацаагаар хориглох шийдвэр гаргах хүсэлтийг нутгийн иргэд, тээвэрлэгчдээс Улсын онцгой комисст ирүүлсэн тул 2020 оны гуравдугаар сарын 2 хүртэл нүүрс тээвэрлэлтийг зогсоож, холбогдох арга хэмжээг авч ажиллахыг салбарын сайдуудад нь   үүрэг болгов. 


АМНЫ ХААЛТЫН ХЭРЭГЦЭЭГ ДОТООДООСОО ХАНГАНА 

Аймаг, нийслэлийн Засаг дарга нар болон Онцгой комиссын дарга нарт аймаг, нийслэлийн хэмжээнд амны хаалт нийлүүлэлтийг нэмэгдүүлэх ажлыг зохион байгуулах. Цэцэрлэг, сургуулийн ажиллагааг түр зогсоосонтой холбоотойгоор цэцэрлэг, сургууль, дотуур байрны хүүхдийн хоол, үдийн цайны зардлыг байгууллагын төсвөөр тооцож, хэмнэгдсэн зардлыг ажилтны илүү, цагийн нэмэгдэл, нийгмийн даатгалын шимтгэл, ариутгал халдваргүйтлийн зардалд шилжүүлэх замаар төсвийн эдийн засгийн ангилалд зохицуулалт хийж, санхүүжүүлэхийг тус тус  үүрэг болголоо.

ЦАГААН САРЫГ ТЭМДЭГЛЭХГҮЙ  БАЙХЫГ ДЭМЖЛЭЭ 

Шинэ коронавирусийн халдварын тархалт Монгол Улсын хилд ойртож ирсэн, 100-180 км Өвөрмонголын нутаг дэвсгэрт 5 тохиолдол бүртгэгдсэнтэй холбогдуулан цагаан сарын баярыг нэг удаа тэмдэглэхгүй байх саналыг дэмжлээ. Гэхдээ эцсийн  шийдвэрийг  ҮАБЗ гаргах юм. Шадар сайд Ө.Энхтүвшин "Золголт хийхээр хөдөө явж ачаалал үүсгэж болохгүй. түүнээс гэр бүлдээ золгох асуудал байж болно. Туйлширч ойлгох хэрэггүй" гэсэн юм. 

Т.Хэрлэн 

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.