ЭТТ ХХК-ийн гүйцэтгэх захирал асан Б.Ганхуягийг үхэлд хүргэх хэмжээнд хүнцэл, хар тугалгаар хордуулсан гэв

Нүүрсний сонсгол гуравдах өдөртөө үргэлжилж байна. Өнөөдрөөс /2024.12.06/ эхлэн том Таван толгой буюу Эрдэнэс Таван Толгой ХК-тай холбоотой асуудлыг хэлэлцэж эхэлсэн. 

Тэгвэл тус сонсголд хамгийн том холбогдогч ЭТТ ХХК-ийн гүйцэтгэх захирлаар ажиллаж байсан Б.Ганхуягийг оролцуулаагүй байна. Үүнтэй холбогдуулан Б.Ганхуягийн гэр бүлийн зүгээс ХЗДХ-ийн сайд, Нүүрсний хянан шалгах түр хорооны дарга Б.Энхбаярт  Б.Ганхуяг нүүрсний сонсголд оролцох хүсэлтэй байгааг илэрхийлсэн. Энэ үеэр Б.Ганхуяг гадны нөлөөтэйгөөр хүнцэл болон хар тугалгаар хордсон талаар мэдээллэв. 

Б.Ганхуягийн хүргэн ах Д.Пүрэвдорж: Б.Ганхуягийг эмнэлэгт хэвтүүлээд бүх шинжилгээг хийлгэсэн. Монгол Улсад ганцхан байдаг эрүүл ахуй хор судлалын шинжилгээ хийлгэсэн. Тэгэхэд Б.Ганхуягийн үснээс 9.06 хувийн хүнцлийн хордлого илэрсэн. Энэ бол үхлийн тун. Хоёрдугаарт цуснаас нь хар тугалга илэрсэн. Энэ хүн гадны нөлөөгөөр хордсон. Энэ хор нь зургаан сарын дотор хүний эд эрхтнийг бүгдийг нь идэж, айжмаар үхүүлдэг хор. 

Б.Ганхуягийн эгч Б.Нарантуяа: 9-р сарын 23-нд Б.Ганхуягийн даралт нь гэнэт унаж, бөөлжилт өгч, суулгасан. Ар гэрийнх нь зүгээс хүсэлт өгсний дагуу 461-р ангийн эмнэлэгт хэвтсэн. Аравдугаар сард биеэр нь юм туурсан байсан ч биеийн байдал нь хэвийн байна гэсэн мэдээлэл өгдөг байсан. Харин Б.Ганхуягийн биеэс илэрсэн хүнцлийн хэмжээ 9200. Хүний биед байх ёстойгоор 9200 дахин илүү байна гэсэн шинжилгээний хариу гарсан. Монгол Улсад хүнийг цагдан хориод, үг хэлийг нь хааж боогоод, хордуулдаг зүйл байдаг юм уу ? Эмчийн шинжилгээ дээр хамгийн түрүүнд үхэх аюултай гэж байна.