Сургуулийн газрын наймааны эсрэг зогсогчид

Боловсрол, Шинжлэх Ухааны сайд Л.Энх-Амгалан 2022 оны арваннэгдүгээр сард хийсэн мэдээллийнхээ үеэр  "Ихэнх сургууль, цэцэрлэгийн нийт газрын 70-80 хувь нь хулгайд алдагдсан, хууль бусаар бусдын нэр дээр шилжсэн байна. Төрийн болон орон нутгийн өмчийн 12 сургууль, цэцэрлэгийн 2.2 га газар, найман их, дээд сургуулийн 2.8 га газар бусдын нэр дээр шилжжээ" хэмээн ярьж байв. 

Боловсролын салбар дахь газрын асуудлыг салбарт томилогдож ирээд буй шинэ сайд П.Наранбаяр бас л хөндөж эхэллээ. 

Тэрбээр "Ховд аймгийн төвийн 1-р сургуулийн хашаан доторх газраас Засаг дарга нь 2019 оны 4 дүгээр сард таслан авч хувьд өгөн, орон сууц бариулахаар болжээ. Өнөөдөр тэнд газрыг нь ухаж хувийн байшин барьж байгааг бид хүлээн зөвшөөрөхгүй. Ажлыг зогсоолгож, холбогдох шалгалтыг явуулж байна. Сургуулийн мэдлийн газраас эрх мэдэлтнүүд хумсалж ирснийг засах, няцаах цаг нь болсон" хэмээжээ.

Процессын тухайд, Ховд аймгийн Засаг даргаар Б.Дүгэржав ажиллаж байхдаа боловсролын байгууллагын зориулалттай 33263 метр квадрат газраас 1700 метр квадрат газрыг орон сууцны зориулалттай болгон өөрчилж таван жилийн хугацаатайгаар эзэмшүүлэх захирамж гаргажээ. Тэрхүү захирамждаа газар эзэмших эрх баталгаажсан ААН-тэй гэрээ байгуулж, газрын төлбөрийг хууль тогтоомжид заасны дагуу төвлөрүүл хэмээн Б.Баярсүх гэдэг хүнд даалгасан байгаа юм. 

Үүнээс жилийн дараа буюу 2020 онд Засгийн газраас сургуулийн газраас бусдад шилжүүлж барилга байгууламж барьж болохгүй гэсэн тогтоол гаргасан. Энэхүү тогтоолын дагуу 2023 онд барилгын ажил зогсоох акт тавьсан байна. 

Гэвч одоо тухайн аймаг Засаг даргагүй байгааг эзгүйчлэн барилгын ажлаа эхлүүлчихсэн байгаа бололтой. Сургуулийн хашаанд баригдаж байгаа эл орон сууцны барилгыг зогсоохоор Засгийн газраас анхаарч ажиллаж байгаа талаар тус аймгийн Засаг даргаар ажиллаж байгаад одоо УИХ-д сонгогдоод буй Э.Болормаа нээлттэй мэдээлжээ. 

Ховд аймгийн Засаг дарга асан Б.Дүгэржавын захирамж

Э.БУЛГАН