Т.Мөнхсайхан: Хэмнэж болох зардлаа хэмнэвэл ирэх онд эмч эмнэлгийн ажилчдын цалинг нэмэх боломжтой

Эрүүл  мэндийн сайд Т.Мөнхсайханаас эрүүл мэндийн даатгалын сангийн асуудал болоод бусад цаг үеийн асуудлаар тодруулга мэдээлэл авлаа. 

Т.Мөнхсайхан: "Эрүүл мэндийн даатгалын санд 2024 оноос хойш төвлөрөх ёстой мөнгө гурван жилийнх нь нийлээд энэ оны эхнийх нь гэхэд 218 тэрбум төгрөг байгаа юм. Энэ оны эхний саруудад хийсэн гүйцэтгэлийн санхүүжилт хэтрэлттэй учраас энэ оны санхүүжилт дээр нэмэлт сангийн мөнгө дутна гэсэн үг. 

Тэгэхээр ирэх оны төсөв дээр энэ жилийн даатгалын санг 16 орчим хувиар нэмэгдүүлж тавиад 360 орчим тэрбум төгрөгөөр нэмэгдүүлээд тавьчихсан байж байгаа. Бид нарын хувьд эргээд 100 хувь санхүүгийн асуудал шийдэгдэнэ гэсэн үг биш. Эрүүл мэндийнхээ салбарын санхүүжилтийг 100 хувь шийдье гэх юм бол бид олон улсын жишиг рүүгээ л очих шаардлагатай. 

Дотоодын нийт бүтээгдэхүүний зургаан хувьд хүргэж чадах юм бол бид нар тэр санхүүжилтээр одоо ард иргэдийн хүсээд байгаа эмнэлгийн тусламж үйлчилгээг бодитоор нь өндөр чанарын түвшинд хүргэж өгч чадна. Үүнийг багаар бодоход Засгийн газрын нийт санхүүжилтийг 12 хувьд хүргэчих юм бол бидэнд боломж үүснэ. 

Тэгэхээр сая хэлсэн санхүүжилтийг нэг дахин нэмэгдүүлж байж бүх асуудал шийдэгдэх түвшинд хүрнэ. Гэхдээ бид үүнийг зөвхөн төсөв мөнгө хүрэлцэхгүй байна гээд хараад суух биш. Даатгалын сангийн зарцуулалт үр өгөөжийг нэмэгдүүлэх, нөгөө тал дээр эрүүл мэндийн байгууллагуудын хэмнэж болох зардлуудаа хэмнэвэл бид эмч эмнэлгийн ажилчдын цалин хөлсийг нэмэгдүүлэх боломжтой гэж харж байна" гэлээ.