Нийслэл "Явган хүний зам шинэчлэх" нэрээр "Мөнгө угаах" гэж байна уу

Өнгөрсөн зун Нийслэл авто замын бордюр солих ажиллагаа явуулж, олон тэрбум төгрөг зарцуулсан билээ. Тэгвэл олон нийтээс "Бордюр ажиллагаа" гэсэн нэр автлаа шүүмжлэл хүртсэн энэ ажлын хоёрдугаар анги ирэх жилээс "Боржин чулуун зам" нэртэйгээр үргэлжлэх бололтой. Нийслэлийн таван байршилд явган замын шинэчлэл хийх зураг төсөв боловсруулж, өндөр төсөвт өртөгтэй тендер зарлажээ. 

Хот өмнө нь "Халтиргаатай замыг халтирдаггүй болгох" нэрийдлээр  хэд, хэдэн газарт байгалийн боржин чулуугаар явган хүний замыг хийсэн бөгөөд олон нийтийн зүгээс "Зүгээр байсан явган хүний замыг хуулж, үргүй зардал гаргалаа" гэсэн шүүмжлэлд өртөж байсан удаатай. Халтиргаа ч арилаагүй юм. Гэтэл үр дүн муутай байгаа нь харагдсаар байтал дахин тендер зарласныг олон нийт шүүмжилж байна. 

Нийслэлийн засаг даргын энэ оны гуравдугаар сарын 05-ны өдрийн А/234 дугаар захирамжийн дагуу хотын чанартай гудамжны явган хүний зам, талбайг халтиргаа гулгаа үүсэхгүй, өнгө үзэмжтэй байгалийн боржин чулуун хавтангаар солихоор болсон байдаг. 

Сүүлийн үед Нийслэл өөрсдөө дагаж мөрдөх стандартаа баталдаг, тэр стандартаа мөрдүүлэхийн тулд зүгээр байсан авто зам, явган хүний замыг дахин шинэчилж, үргүй зардал гаргасаар байгаа юм. 

Явган хүний зам талбайг шинэчлэхээр тендер зарлагдсан байршил: 

• Их тойруугийн гудамж /Урд, ард хэсэг/
• Бага тойруугийн гудамж /Урд, ард хэсэг/
• Чингисийн өргөн чөлөө /1,2,3,4-р хэсэг/
• Олимпын гудамж /Баруун, зүүн/ 
• Сүхбаатарын талбай /Ойр орчмын 1.2км явган зам/ 

Их тойруугийн гудамжийн явган хүний зам талбайн тохижилтод нийт 11.8 тэрбумтөгрөг төлөвлөсөн байна. Үүний 5.9 тэрбум нь энэ онд санхүүжих дүн юм байна. Тодруулбал Их тойруугийн гудамжийн урд хэсэгт 2 тэрбум 793.9 сая төгрөг, хойд хэсэгт 3 тэрбум 107.9 сая төгрөгийг энэ онд зарцуулах юм байна. 

Бага тойруугийн гудамжийн явган хүний зам талбайн тохижилтод 6.933 тэрбум төгрөг төсөвлөсөн. Мөн урд, ард хэсэг гэж хоёр хуваагдах бөгөөд нийт төсөвт өртөг буюу 3 тэрбум 466.4 саяыг энэ онд санхүүжүүлэх юм байна. 

Чингисийн өргөн чөлөө 1-4 хэсгийн явган хүний зам талбайн тохижилтийг 10.8 тэрбумаар хийнэТус явган хүний зам талбайн тохижилтийг дөрвөн хэсэгт хувааж дөрвөн тендер зарласан. Тус бүр 2.3-3.4 тэрбумын хооронд төсөвт өртөгтэй байна. Харин энэ онд нийтдээ 3.2 тэрбумын санхүүжилт авах юм байна. 

Олимпын гудамж, Их Монгол Улсын гудамжийн явган хүний зам талбайн тохижилтийг 5.6 тэрбумаар хийнэНийт төсөвт өртөг нь 5.6 тэрбум. Энэ онд санхүүжих төсөвт өртөг нь 2.7 тэрбум. Баруун, зүүн гэж хоёр тендер зарласан.

Сүхбаатарын талбай орчмын явган замын тохижилтыг тэрбум 166 саяар хийнэ

Үүнийг нэг талаас явган хүний замыг халтирдаггүй болгох гэж байна гэж харж болох ч бүрэн бүтэн байгаа явган хүний замуудыг өндөр төсөв гаргаж шинэчлэх нь ач холбогдолтой эсэх нь эргэлзээтэй. Зөвхөн таван байршилд л 36.3 тэрбум төгрөгийг явган хүний замыг шинэчлэхэд зарцуулна. Мөн тухайн таван байршил бол хотын төвийн явган хүний зам бүхий хэсгүүд юм. 

Утаа, түгжрэл, эрчим хүчний дутагдал, харанхуй гудамжууд, төрийн үйлчилгээ авч чаддаггүй байдал гээд үй олон асуудал Нийслэл Улаанбаатар хотод тулгарч байгаа. Харин нийслэлийн удирдлагууд маань явган хүний замгүй, гэрэлтүүлэггүй гэр хорооллын орчныг сайжруулах бус хэвийн байгаа хотын төвийн явган хүний замыг дахин шинэчлэхэд ихээхэн хэмжээний мөнгө төсөвлөж, зарцуулах гэж байгаа нь "мөнгө угааж" байна уу гэх хардлага төрүүлж буй.