У.Хүрэлсүх: Түүхэн эгзэгтэй цаг үед улс орноо зөв удирдан хоёргүй сэтгэлээр зүтгэнэ гэдэгт огт эргэлзэхгүй байна

УИХ-ын чуулганы нэгдсэн хуралдаанд оролцсон гишүүдийн 87.9 хувийн саналаар Лувсаннамсрайн Оюун-Эрдэнийг Монгол Улсын Ерөнхий сайдаар томиллоо.

Ерөнхий сайд асан У.Хүрэлсүх 32 дахь Ерөнхий сайдад тамгыг нь гардуулж ажлын амжилт хүсэн ерөөв.

Засгийн газрын Хэвлэл мэдээлэлтэй харилцах хэлтэс

Засгийн газрын Хэвлэл мэдээлэлтэй харилцах хэлтэс

Тэрбээр “Түүхэн эгзэгтэй цаг үед улс орноо зөв удирдан, ард түмнийхээ эв нэгдлийг сахин хамгаалж, хоёргүй сэтгэлээр зүтгэнэ гэдэгт огт эргэлзэхгүй байна” гэв.

Ерөнхий сайд Л.Оюун-Эрдэнэ “Таны тэргүүлж байсан Засгийн газрын бодлогыг үргэлжлүүлж, газрын тос боловсруулах үйлдвэр барих зэрэг томоохон бүтээн байгуулалтыг дуусгана. Монгол Улсаа хөгжүүлэхийн төлөө үүрэг, хариуцлагаа дээд зэргээр ухамсарлан ажиллана” гэлээ. 

Товч намтар:

Овог, нэр: Хурц овогт Лувсаннамсрайн Оюун-Эрдэнэ 
Төрсөн он, сар, өдөр: 1980.06.29
Гэр бүл: Ам бүл 5. Эхнэр, хүүхдүүдийн хамт амьдардаг

Боловсрол: 

• 1998 онд Хэнтий аймгийн Бэрх хотын Ерөнхий боловсролын сургууль 
• 2001 онд Бэрс дээд сургууль. Сэтгүүлч 
• 2008 онд МУИС-ийн Хууль зүйн сургууль. Эрх зүйч 
• 2015 онд Харвардын их сургууль. Төрийн удирдлагын магистр 

Ажлын туршлага:

• 2001 онд Хэнтий аймгийн Бэрх хотын захирагчийн албанд Тамгын газрын дарга 
• 2002 онд “Дэлхийн Зөн Монгол” олон улсын байгууллагын Хэнтий салбарын захирал 
• 2006 онд “Дэлхийн Зөн Монгол” олон улсын байгууллагын Бүс хариуцсан захирал 
• 2008 онд Нийслэлийн Баянзүрх дүүрэгт Нийгмийн хөгжлийн хэлтсийн дарга 
• 2009 онд МАН-ын Удирдах Зөвлөлийн Хэрэг эрхлэх газрын дарга 
• 2010-2014 онд НАМЗХ-ны Ерөнхийлөгч 
• 2011 онд МАН-ын Нарийн бичгийн дарга 
• 2012 онд МАН-ын Ерөнхий нарийн бичгийн даргын үүрэг гүйцэтгэгч 
• 2016 оноос Монгол Улсын Их Хурлын гишүүн
• 2019 оноос Монгол Улсын сайд, Засгийн газрын Хэрэг эрхлэх газрын дарга
• 2020 оноос Монгол Улсын Их Хурлын гишүүн

 Эх сурвалж: Засгийн газрын Хэвлэл мэдээлэлтэй харилцах хэлтэс