Н.Номтойбаяр автомашинаар дамжуулан УЛС ТӨРИЙН ШИНЭЧЛЭЛ хийх санаа дэвшүүлэв үү

Өчигдөр УИХ-ын гишүүн асан Н.Номтойбаярын Зил-131, ZETROS автомашиныг харьцуулсан бичлэг олон нийтийн сүлжээнд тарж, анхаарал татав. Ингэхдээ "Бидний хөгжил хаана байна вэ?! Бүгдээрээ баяжих бодлогоо боловсруулъя. Сэтгэлгээний болон санхүүгийн тогтолцоогоо өөрчилье. ХХ зуунаас XXI зуунд шилжье. Жишээ нь ОХУ-ын ЗИЛ-131, Mercedens Benz-ийн Zetros" гэсэн юм. 

Түүний хэлсэн үг нэг талаас, хуучин автомашиныг шинэ автомашинаар солих асуудал хөндсөн мэт харагдаж болох ч цаад санаа нь хуучин тогтолцоог халж, шинэчлэл хийх санаа илэрхийлсэн байх талтай. 

Тэрбээр УДШ-д бүртгэлтэй улс төрийн намуудын гуравдугаарт бичигддэг Монголын Ногоон намыг гартаа атгаж, МҮАН-тай "Үндэсний эвсэл" байгуулсан тул коммунизмын үеийн Зил-131 машинаар МАН-ыг, шинэ цагийн хүчин чадал сайтай Zetros маркийн машинаар "Үндэсний эвсэл"-ийг төлөөлүүлсэн байх боломжтой юм. 

Өөрөөр хэлбэл, "Коммунизмын үед үйлдвэрлэгдсэн Зил-131 машин, капиталист Германд бүтээгдсэн ZETROS  машины хүчин чадлыг харьцуулан, ажлын бүтээмж маш өндөр гэдгийг удаа дараа илэрхийлж, "21-р зуунд машин маниулдмааргүй байна, сэтгэлгээний болон санхүүгийн тогтолцоогоо өөрчилье" гэсэн санаа байж болно. 

Уг нь Н.Номтойбаяр МАН-аас УИХ-д сонгогдож, сайдаар хүртэл ажиллаж байсан. Гэсэн ч түүний хувьд намаасаа хасагдсан учраас 2020 оны УИХ-ын сонгуульд бие даан нэр дэвшсэн. Хэсэг чимээгүй байсныхаа дараа хоёр нам нэгдсэн "Үндэсний эвсэл" байгуулж, 2024 оны УИХ-ын сонгуульд оролцохоор болсон. Энэ нь улс төрийн өнцөгөөс харвал "Үндэсний эвсэл"-ийн тэргүүний хувьд эрх баригчидтай "тэмцэх"-ээ зарласан хэрэг бөгөөд эхний акцаа ийнхүү маш ухаалаг жишээгээр хийчих шиг болов.