П.Сайнзориг: "Би чадна" гэсэн цүнхний компаниуд тендер авчхаад цааш нь дамлаж зардаг. Тэгэхээр яг хийж чадах компаниудад боломж олгодог байя

УИХ-ын ээлжит бус чуулганаар 2024 оны улсын төсвийн тодотголыг хэлэлцэж байгаа бөгөөд дагаж орж ирж буй зарим хуулийн төсөл нь УИХ-ын гишүүдээс шүүмжлэл хүлээгээд байна. Тодруулан хэлбэл, тендер зарлаад ААН шалгарахгүй бол шууд худалдан авах ажиллагаа хийх хяналтгүй тогтолцоо бий болгохоор заасан байгаа юм. 

Харин УИХ-ын гишүүн П.Сайнзориг дээрх заалтыг дэмжиж буйгаа илэрхийлж, яагаад дэмжиж буйгаа тайлбарлалаа. 

Тэрбээр "Би бол зарчмын хувьд дэмжиж байгаа. Ер нь бол Европын, өндөр хөгжилтэй орнууд тендер сонгон шалгаруулалтын маш олон аргыг хэрэглэж байгаа. Манайх тендерийн хууль дээр нээлттэй тендер болон нэг их сурвалжаас худалдан авалт гэсэн хоёр арга замыг заачхаад байгаа. Бусад худалдан авалтын буюу чадавхад суурилсан худалдан авалтыг нэмэлтээр оруулж ирж байгаа нь зөв. Тодруулаад хэлбэл, тодорхой хэмжээний мэдлэг, технологи, ажиллах хүчтэй компаниудыг урьж авчирч томоохон дэд бүтцийн төслүүд дээрээ хамтарч ажилладаг болно гэсэн үг. Өнөөдөр томоохон дэд бүтцийн төслүүд дээр "би чадна" гэсэн цүнхний компаниуд тендер авчхаад цааш нь дамлаж зарж байна. Эсвэл дотоодын болон гадаадын эрх ашгийн үүднээс гацааж байна. Мөн тендерт орсон компаниуд шалгарах нь хамаагүй, гомдол гаргаж шалгарсан компанийг шантааж хийдэг байдал хавтгайрчхаад байна. Шууд гэрээ байгуулах гээд байгаа юм биш. Процесс нь олон нийтийн өмнө ил тод явна. Хэн техникийн зөв санал өгч байна, хэн нь Монгол Улсын эрх ашигт нийцүүлж энэ төсөл хөтөлбөрийг хэрэгжүүлж чадахаар байна гэдгийг нь харж шалгаруулна. Түүнээс биш хамгийн хямд үнэ өгснийг нь шалгаруулахгүй. Хулгай зэлгээнээс ангижиръя. Хариуцлагатай хийж чадах компаниудад боломж олгодог байя" гэлээ.

Дэлгэрэнгүйг дараах видеоноос үзнэ үү.