С.Батдөл эхнэр М.Сайнбилэгтэйгээ "барьцаалан зээлдүүлэх бизнес" эрхэлдэг

Өнгөрөгч долоо хоногт Эрүүгийн цагдаагийн албанаас “УБТЗ” ХНН-ийн Тээвэр зохион байгуулалтын албаны орлогч дарга С.Батдөлийн гэр болон хамаарал бүхий этгээдүүдийнх нь орон сууц, оффист нэгжлэг хийж, 7.3 тэрбум төгрөг бэлнээр, дөрвөн тэрбум төгрөгийн үл хөдлөхийн гэрчилгээ хурааж авсан. Өнөөдөр/2022.01.09/ түүнийг цагдах хорих эсэхийг шүүхээр хэлэлцэх юм. 

Тэгвэл С.Батдөл нь эхнэр М.Сайнбилэгтэйгээ "Монте андууд" ХХК-г эзэмшдэг ба тус компани нь  барьцаалан зээлдүүлэх бизнес эрхэлдэг байна. 

С.Батдөл эртнээс барьцаалан зээлдүүлэх бизнес эрхэлдэг байсан гэх бөгөөд Ergelt.Mn сайт ч энэ талаар мэдээлэл бэлтгэн хүргэсэн байна. 

"С.Батдөлийн хувьд бусдад ихэнхдээ 10-20 сая төгрөг хүүтэй мөнгө зээлддэг байсан бөгөөд ингэхдээ орон сууцыг нь барьцаалж, зарим тохиолдолд зээлсэн мөнгөнийхөө хүүнд орон сууцанд нь амьдрах гэрээ хийдэг байжээ.Харин 2020 оны сүүлээс С.Батдөл өөрөө орон сууц барьцаалан бусдаас хүүтэй мөнгө зээлж, зээлсэн мөнгөө цааш дамлах хэлбэр рүү оржээ. Тухайлбал, эхнэр М.Сайнбилэг нь “25 сая төгрөг хүүтэй зээлж, хүүнд нь Баянзүрх дүүрэгт, Кино үйлдвэрт байрлах 3 өрөө байранд 1 нэг жил суулгана” гэх зарыг хэдэн арван сошиал хуудаст тарааж байсан байх ажээ."

Эндээс харвал С.Батдөл нь эртнээс "барьцаалан зээлдүүлэх бизнес" эрхэлдэг байсан бөгөөд хэд хэдэн байртай. Барьцаалан зээлдүүлэх бизнесээрээ дамжуулан бусдаас мөнгө зээлээд, хүүнийх нь оронд байрандаа амьдруулдаг байсан аж.