Ч.Өнөрбаяр: АН бүлэггүй болсон биш, МАН биднийг бүлэггүй болгосон

Өнөөдөр Ардчилсан Нам XIV-р их хурлаас гаргасан шийдвэрээ танилцууллаа. Энэ талаар АН-ын ерөнхий нарийн бичгийн дарга Ч.Өнөрбаяр:

"Манай намын зүгээс хоёр албан бичиг гаргасан. 

1.  МУ-ын Ерөнхийлөгчид хуульд хориг тавих хүсэлт 
2. УИХ-ын даргад албан шаардлага хүргүүлсэн

МУ-ын Үндсэн хуульд Ерөнхийлөгч ямар ч хуульд хориг тавих онцгой эрхтэй. Тиймд бид бүхний зүгээс Ерөнхийлөгчид, "Та онцгой бүрэн эрхийн хүрээнд МАН-ын бүлгийн хуйвалдааны хуульд хориг тавьж өгөөч" гэдэг хүсэлтийг гаргасан. 

Энэ хууль нь АН-ын бүлэг, даргын асуудалд эрх баригч олонхоороо түрий барьж, хуйвалдан, хутгалдан оролцон баталсан хууль юм. Энэ хуулийг хэлэлцээд эхэлснээс хойш УИХ-ын гишүүн Д.Ганбат бүлгээс гарах шийдвэр гаргаснаар АН бүлэггүй болсон. Иймд бүлэгтэй ганц нам нь МАН болж хувирсан. Тэгэхээр энэ хууль цаашлаад бүлгийн дарга Д.Тогтохсүрэнд ухсан нүх болж хувирсан. 

Харин УИХ-ын даргад тавьсан шаардлага нь Ерөнхийлөгчийн хуульд хориг тавих бүрэн эрхэд халдсан тохиолдолд "Үндсэн хууль зөрчсөн" гэж шууд огцрох ёстой гэдгийг сануулж шаардлага хүргүүлж байна.

Мөн Ардчилсан Намын их хурлын үеэр ОХУ-ын Гадаад хэргийн сайд С.В.Лавровын Монголд хийж байгаа айлчлалын талаар ярилцсан. Аливаа том гүрэн  буруу бодлого явуулбал амархан бууран доройтдог гэдгийг олон үйл явцаас харж байна. Саяхан Их-8-д, НҮБ-ын Аюулгүйн зөвлөлийн байнгын гишүүн 5 улсын нэг байсан ОХУ удирдагч нарынхаа харалган бодлогоос болж, өнөөдөр дэлхийн жижиг гүрэн болж хувирлаа. Өнөөдөр ОХУ-ын гадаад хэргийн сайд  С.В.Лавров гэдэг хүн бол аль ч улсад айлчилж, гадаад бодлогыг илэрхийлдэг байсан бол одоо Монголоос өөр хүлээж авах улсгүй болтлоо жижгэрлээ. Ийм л байдал руу орлоо. Эдгээр удирдагч нарын буруу бодлогын төлөөсийг ард түмэн л үүрнэ. Бид Оросын ард түмнийг өрөвдөж байгаа. 

 С.В.Лавровын монголд ирсэн айлчлал нь цаанаа ямар нэгэн байдлаар тулгалт ирэх гэж байна гэж хардаж байгаа. Дээрээс нь Б.Батцэцэг сайдад МУ-ын Гадаад бодлогын үзэл баримтлалаа  С.В.Лавровт тов тодорхой илэрхийлээсэй гэж хүсч байна.

АН бүлэггүй болсон биш, МАН биднийг бүлэггүй болгосон. Иймд МАН сөрөг хүчингүй болсон учраас ууртай ард түмэнтэй өөрсдөө нүүр туулъя гэж шийдэж байгаа гэж би ойлгосон. Тэгээд Г.Занданшатар дарга "АН-ынхан та нар бүлгээ авч үлдээд сөрөг хүчнийхээ ажлыг хийгээч, та нар бидэнд хэрэгтэй байна" гэсэн. Манай намын асуудал чамд ямар хамаатай юм. Эсгий хийх газар нохой хэрэггүй гэдэг шиг чи өөрийнхөө намын асуудал, Үндсэн Хуулиа хамгаал" гэлээ.