Ерөнхий сайдын "САЙН" дүү М.Ганхүлэг ХХААХҮ-ийн дэд сайдаар томилогдоно

МАН-ын Удирдах зөвлөл өнөөдөр /2022.10.21/ хуралдаж, Хэнтий аймгийн нутгийн зөвлөлийн Гүйцэтгэх захирал, МАН-ын дэргэдэг Социал Демократ Монголын залуучуудын холбооны Ерөнхийлөгч М.Ганхүлэгийг ХХААХҮ-ийн дэд сайдад дэмжлээ.

Өмнөх дэд сайд буюу Ж.Бат-Эрдэнэ нь Дарханы тендерийн замын асуудалтай холбогдон АТГ-т шалгагдаж, 30 хоног цагдан хоригдож байгаа юм. МАН-ын Удирдах зөвлөлөөс дэд сайдаар томилогдох нь зүйтэй хэмээн шийдээд байгаа М.Ганхүлэгийг засгийн газрын хуралдаанаар томилох эсэхийг шийднэ. 

Тэгвэл ХХААХҮ-ийн дэд сайдад дэмжигдсэн М.Ганхүлэгийг та бүхэнд танилцуулъя:

М.Ганхүлэг нь 1991 онд төрсөн бөгөөд Хэнтий аймгийн иргэдийн төлөөлөгчдийн хурлын төлөөлөгч юм. 

"Ард контент групп"-ийн гүйцэтгэх захирал 

Түүний хувьд эртнээс одоогийн Ерөнхий сайд Л.Оюун-Эрдэнэтэй ойр байсан бөгөөд Засгийн газрын гишүүн болохоос нь албан тушаал хашиж эхэлсэн юм. Тодруулбал:

• 2019 онд Ерөнхий сайд Л.Оюун-Эрдэнийг ЗГХЭГ-ын дарга байх үед Засгийн газрын хэрэг эрхлэх газрын даргын олон нийтийн харилцаа хариуцсан зөвлөх
• 2020.09.22-нд МАН-ын Удирдах Зөвлөлийн хурлаар намын Хэрэг эрхлэх газрын Улс төрийн бодлогын газрын даргаар томилогдсон. 
• 2020 оноос Хэнтий аймгийн ИТХ-ын төлөөлөгч

Харин Л.Оюун-Эрдэнийг МАН-ын дарга, Ерөнхий сайд болсны дараа НАМОХ буюу одоогийн Социал Демократ Оюутны холбооны Ерөнхийлөгчөөр томилогдсон юм. 

• 2022 оны гуравдугаар сараас Социал Демократ Оюутны холбооны Ерөнхийлөгч 
• 2022 оноос Ерөнхий сайд Л.Оюун-Эрдэнийн ажлын албаны гишүүн, зөвлөх 
• Хэнтий аймгийн нутгийн зөвлөлийн гүйцэтгэх захирлаар ажиллаж байгаа аж. 

М.Ганхүлэг 2020 оны орон нутгийн сонгуульд ялалт байгуулж ИТХ-ын төлөөлөгчөөр сонгогдсон. Түүний 2021 оны хөрөнгө орлогын мэдүүлгийг та бүхэнд хүргэе. 

• Хувийн орлого нь 31.2 сая
• Гэр бүлийн орлого нь 21.6 сая 
•  298 сая төгрөгийн хоёр орон сууцтай 
• 14 сая Toyota, Prius XW30 маркийн автомашинтай 
•  124.5 саяар үнэлэгдэх малтай
• 75 сая төгрөгийн үнэт эдлэлтэй
• 25 саяын хадгаламжтай 
•  201 сая төгрөгийн зээлтэй  
• Компани: "Ашдын Түүчээ" ХХК-ийн 80 хувийг, "Ард Контент Групп" ХХК-ийн 50 хувийг эзэмшдэг хэмээн ХОМ-дээ мэдүүлжээ. 

Түүний талаар ЗГХЭГ-ын дарга Д.Амарбаясгалан "М.Ганхүлэг нь залуу боловсон хүчин. Мөн ХХАА-н мэргэжилтэй, ХААИС-ийг төгссөн тэргүүлэгч залуу. МАН бол залуу үеэ байнга бэлтгэж ирдэг" гэсэн юм.