COP27: Ерөнхийлөгч У.Хүрэлсүхийн хэлсэн ОНЦЛОХ 10 ЭШЛЭЛ

Уур амьсгалын өөрчлөлтийн асуудлаарх олон улсын дээд түвшний чуулган Египет улсын Шарм-Эль-Шейх хотноо болж байна.

Энэ үеэр Монгол Улсын Ерөнхийлөгч У.Хүрэлсүхийн хэлсэн үгнээс 10 ЭШЛЭЛ-ийг ОНЦЛОН хүргэж байна. Тэрбээр хэлсэн үгнийхээ эхэнд  "Дэлхий нийтийг хамарсан хүнс, эрчим хүчний хомсдол, үнийн өсөлт, геополитикийн хурцадмал байдал зэрэг хүндрэл бэрхшээлтэй асуудал олон байгаа хэдий ч дэлхийн улс орнууд тогтвортой хөгжлийн зорилтоо ханган хэрэгжүүлэх, түүн дотроо уур амьсгалын өөрчлөлтийн эсрэг тэмцэх хүчин чармайлтаа хэрхэвч сулруулж болохгүй бөгөөд харин ч улам идэвхтэй ажиллах явдал чухал байна" гэдгийг онцолж байлаа. 

1. ХӨРС, ХҮНС, ХҮН гурав хүйн холбоотой. Хөрс эрүүл бол хүнс эрүүл, хүнс эрүүл бол хүн эрүүл байна.

2.Уур амьсгалын өөрчлөлтийн эсрэг тэмцэх үйл хэрэг бол ХӨРСӨӨ ХАМГААЛАХ, ХҮНСЭЭ ХАМГААЛАХ, ХҮНЭЭ ХАМГААЛАХ ХҮН ТӨРӨЛХТНИЙ СУУРЬ АСУУДАЛ МӨН. 

3.“Тэрбум мод” үндэсний хөдөлгөөнийг амжилттай хэрэгжүүлснээр Монгол орны ойн сан нэмэгдэж, хүлэмжийн хийн шингээлтийг нэмэгдүүлэх боломж бүрдэхээс гадна хөрс хамгаалал, хөдөө аж ахуйн үйлдвэрлэл, хүнсний хангамж, аюулгүй байдал сайжрах, ажлын байр нэмэгдэх зэрэг нийгэм, эдийн засгийн олон асуудлыг шийдвэрлэхэд эергээр нөлөөлнө.

4. Монгол Улс Европын холбооны “Ойн түншлэл” хөтөлбөрийн хүрээнд хамтран ажиллах АЗИ ТИВИЙН АНХНЫ УЛС болж байгааг дуулгахад таатай байна.

5. Монгол Улсын эрчим хүчний нийт суурилагдсан хүчин чадлын 18.2 хувийг сэргээгдэх эрчим хүчээр хангаж байгаа бөгөөд 2030 он гэхэд энэ үзүүлэлтийг 30 хувьд хүргэхээр зорьж байна.

6. Хүлэмжийн хийн ялгарлыг бууруулах, шингээлтийг нэмэгдүүлэх, уур амьсгалын өөрчлөлтөд дасан зохицох чадавхаа бэхжүүлэх зорилгоор Монгол Улс “Үндэсний дасан зохицлын төлөвлөгөө”-г боловсруулан хэрэгжүүлэх замаар хүлэмжийн хийн ялгарал болон шингээлтийн зөрүүг ойртуулж, 2050 он гэхэд “Тэглэх” зорилт тавин ажиллаж байна.

7. Монгол Улс НҮБ-ын ЦӨЛЖИЛТТЭЙ ТЭМЦЭХ КОНВЕНЦЫН ТАЛУУДЫН 147 ДУГААР БАГА ХУРЛЫГ 2026 ОНД УЛААНБААТАР ХОТНОО ЗОХИОН БАЙГУУЛНА.

8. Монгол Улс дэлхийн улс орнууд, олон улсын байгууллагууд, донор болон хөгжлийн түншүүд Та бүхэнтэй бүх талаар нээлттэй, харилцан ашигтай, үр дүнтэй хамтран ажиллах хүсэл эрмэлзэлтэй байгаагаа энэхүү хүндэт индрээс дахин илэрхийлж байна.

9. Та бидний харилцан ойлголцол, хамтын ажиллагаа, зоримог шийдвэр, тууштай хичээл зүтгэл уур амьсгалын өөрчлөлтийн эсрэг тавьсан зорилтоо цаг хугацаанд нь амжилттай ханган хэрэгжүүлж, цаашлаад тогтвортой хөгжлийг цогцлооход онцгой чухал үүрэгтэй юм.

10. ЭХ ДЭХИЙ БИДНИЙ ГЭР ОРОН, ЭХ БАЙГАЛЬ БИДНИЙ ОРШИХУЙН ҮНДЭС гэдгийг үргэлж санаж ирээдүй хойч үеийнхээ сайн сайхны төлөө нэгэн зорилго, нэгдмэл хүсэл тэмүүллээр хамтран зүтгэцгээе!