СУРВАЛЖИЛГА: Шон мөргөж "үхлээ", стандарт яасан бэ хотын дарга аа?

2020 оны 10 сарын 19

Түгжрэлгүй, утаагүй, бухимдалгүй, иргэнээ дээдэлсэн, аюулгүй хот болгох “Аз жаргалтай хот” хөтөлбөрийг 2016-2020 он хүртэл амжилттай зохион байгуулсан гэх. Тэгвэл “Аз жаргалтай хот” хөтөлбөрийн биелэлт нь иргэдийн төсөөлж байгаагүй өндөр үзүүлэлттэй буюу 92.5 хувийн гүйцэтгэлтэй байгааг нийслэлийн удирдлагууд танилцуулсан нь олныг гайхшруулсан.

Сонирхолтой нь, хөтөлбөрийн гүйцэтгэл үнэхээр 92.5 хувь байгаа юм бол нийслэлд их л олон зүйл өөрчлөгдсөн байх ёстой баймаар. Гэтэл Нийслэлийн удирдлагууд хөтөлбөр хэрэгжихэд тулгамдсан олон асуудал байна гээд яриад байгааг нь сонсохоор хэрэгжилтийнх нь хувь хэмжээ яагаад ч 92.5 хувьд хүрсэн байх боломжгүй баймаар.

НИТХ-ын дарга Р. Дагва хэвлэлийнхэнд хандахдаа “Аз жаргалтай хот төсөл яаж хэрэгжсэнийг гудамжаар яваад хар. Улаанбаатар хотод хүмүүсийн амарч, зугаалах тав тухтай газрууд олон бий. Хүмүүсийн амьдрах орчин нөхцөлийг тав тухтай болгох, аз жаргалтай байлгах олон ажил хийсэн” гэв. Хэлсэн үг нь оргүй хоосон зүйл мэт.

Нэгэн иргэний цахим хуудаснаа нийтэлсэн гомдлын дагуу манай сурвалжлах баг тухайн газарт нь очиж үзэхэд гэрлийн шонгийн суурийн төмөр нь иргэдийг аюулгүй зорчиход саад болох төдийгүй гэмтээж, бэртээх өндөр эрсдэлтэй байлаа.

                                        Манайд тэр гомдол нь ирчихсэн байгаа

Энэ асуудлын дагуу ХИБХ-ын Цахилгаан хангамж, гэрэлтүүлэг, холбооны асуудал хариуцсан мэргэжилтэн Ц. Болортунгалагаас тодруулахад “Манайд тэр гомдол нь ирчихсэн байгаа. Гомдолыг нь шийдвэрлүүлэхээр ашиглагч компани-д нь шаардлага хүргүүлсэн. Иргэдийн гомдолыг 24 цагийн дотор шийдвэрлэдэг. Сонгино Хайрхан дүүрэгт “Баянхошуу дэд төв”-тэй холбоотой маш их гэрлийн шонгуудыг буулгаж байгаа. Учир нь хуучин байсан шонгуудыг буулгаад оронд нь авто зам тавьж байгаа юм.      

“Нийслэлд нийт 65 мянга орчим гэрэлтүүлгийн шон бий. Бид нээлттэй тэндерыг цахимаар зохион байгуулдаг. Тэндерт санал ирүүлж буй байгууллагууд өөрсдийн хүслээр тооцоо судалгаагаа гаргаад тэндерт өрсөлдөх эрхээ авдаг. Бид тэндер шалгаруулах журмын дагуу шаардлага хүргүүлдэг. Тэндерийн хүчинтэй хугацаанд гүйцэтгэх чадамжийг нь тус тус харгалзан үзээд сонгон шалгаруулалтаа хийдэг.

Нийслэлийн Засаг Даргын Тамгын Газрын захирамж гаргасны дагуу эрхийг нь Захирагчийн ажлын албанд шилжүүлдэг. Мөнгө санхүү нь манайх руу шилжээд ороод ирсэн тохиолдолд манайх худалдан авах ажлыг зарлаад, үүнийхээ дагуу компаниа шалгаруулаад, шалгарсан компанийн гэрээг Нийслэлийн Засаг Даргын Тамгын Газар-т байгуулаад, байгуулсан гэрээг Нийслэлийн Хөрөнгө Оруулалтын Газар руу шилжүүлдэг. Шилжүүлсэн тохиолдолд Нийслэлийн Хөрөнгө Оруулалтын Газар бүх гэрээг нь байгуулаад, ажлынх нь явцад хяналтаа тавиад, Улсын Комиссыг ажиллуулдаг. Комисс хүлээж авсан тохиолдолд төрийн өмчийн тогтоолоор эзэмшигч компани-д шилжүүлж өгдөг. Жишээ нь цахилгааны ажлыг УБЦТ-рүү, гэрэлтүүлгийн ажлуудыг Нийслэлийн Өмч-рүү бичиг хүргүүлж шилжүүлдэг. Өгсөн тохиолдолд гэрэлтүүлэг хариуцдаг 13 байгууллагын өмчид шилжүүлнэ.

Гэрэлтүүлгийн шон хугарах, машин очиж мөргөх, барилгатай зай хэмжээ ойртох эсвэл шинээр гэрлийн шон тавигдаж байгаа тохиолдолд сууриа хийгээд дээр нь бэлэн шон байхгүй үед шонг гагнана, будна, хатаана гэсээр их хугацааг авдаг.

Машин механизм, тоног төхөөрөмж тухайн хугацаанд буюу 30 хоногт хийж гүйцэтгэх ёстой юу? 20 хоногт хийж гүйцэтгэх ёстой юу? гэдгийг тухайн тэндер авсан компани мэднэ” гэв.

Энэ тухай иргэдийн саналыг сонсоход:

Иргэн З. Төгсбаяр: Өглөө, оройдоо энүүгээр явахад төмөрнүүд нь гарч ирснийг  харах боломжгүй байдаг. Хэд хэдэн удаа бүдэрч өөрийгөө бэртээж байсан. Жоохон хүүхдүүдэд бүр их аюултай санагддаг. Унавал толгойгоороо унах гээд байдаг юм.

Иргэн А. Чимэг: “Би гудамжинд худалдаа эрхлээд их удаж байна. Энэ төмөр миний мэдэхын их удлаа. Хүмүүс бүдэрч унаж байгаа нь их харагддаг. Би хүртэл унаж л байлаа. Шийдвэрлэж өгөх хүн байдаггүй бололтой” гэв.

Гэтэл тухайн гэрлийн шонг хийж гүйцэтгэх хугацаа нь ихдээ 30 хоног байтал, үүнээс их хугацаа өнгөрөөд байхад хэн нь ч шийдвэрлээгүй байна. Нийслэлийн зүгээс гаргаж буй ихэнх шийдвэр иргэдийн шүүмжлэлийг дагуулсаар ирсэн. Нийслэлээс авч хэрэгжүүлж байгаа ажилд хэн нь хяналт тавьж ажилдаг, гүйцэтгэл, стандартыг хэр сайн баримталдаг нь гудамжаар яваад харахад илт.

Н.Мөнхжин

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.