Монголбанкны дэд ерөнхийлөгч Г.Энхтайван ОХУ-ын Засгийн газрын орлогчийг уурлуулснаас шатахуун хомсдож эхлэв үү

Хот, хөдөөгүй шатахуун ховордож, иргэд хонон өнжин бензинд очерлож байна. Уг нь  АҮЭБ-ийн сайд Г.Дамдинням ОХУ-тай хэд хэдэн удаагийн уулзалт хийж, Монголд шатахуун хэвийн нийлүүлэхээ хойд хөршийн тал мэдэгдээд байсан юм.

Гэтэл одоо шатахуун тасалдаж эхэллээ. ОХУ-ын Засгийн газрын орлогч дарга Алексей Оверчук есдүгээр сарын 14–15-ны өдрүүдэд Улаанбаатар хотноо албан ёсны айлчлал хийхдээ Монгол Улсад түлш, шатахууны тогтвортой нийлүүлэлтийг хангах, тээвэр, логистикийн хүчин чадлыг нэмэгдүүлэх талаар уулзалт хийсэн байдаг. Энэ уулзалтаар Оросын талаас “Манайх шатахуунаа хэвийн нийлүүлье. Харин танайх нэг зүйлд анхаарал хандуулахыг хүсье” гээд 2026 оны есдүгээр сарын 4-ний өдөр Монголын Худалдаа, хөгжлийн банкнаас “Газпромбанк”-нд цахим шуудангаар мэдэгдэл ирүүлж, “Газпромбанк”-ны корреспондент дансны статусыг нэг талын шийдвэрээр өөрчилж, хаах хүртэл нь царцаах, бас ХХБ-ны “Газпромбанк” дахь харилцан тооцооны дансуудыг хаах тухай мэдэгдсэн. Төлбөр тооцооны асуудалд анхаарал хандуулж өгөөрэй” гэжээ.

Гэтэл хуралд оролцож байсан Монголбанкны дэд ерөнхийлөгч Г.Энхтайван “Худалдаа, хөгжлийн банкнаас авсан мэдээллээр, АНУ болон Европын Холбооны холбогдох байгууллагуудын хяналт, шалгалт Худалдаа хөгжлийн банк болон Монголын томоохон арилжааны банкуудад явагдаж байгаа. “Газпромбанк” АНУ болон Европын Холбооны хориг арга хэмжээнд хамрагдсан банкуудын нэг тул уг шалгалт дуусах хүртэл тус банктай холбоотой дансны ажиллагааг түр хугацаанд хязгаарласан байна. Худалдаа, хөгжлийн банкны зүгээс шалгалтын ажиллагаа дууссаны дараа “Газпромбанк”-тай холбоотой корреспондент дансны ажиллагааг сэргээх боломжтой гэдгийг мэдээлсэн” гэх тайлбар өгчээ.

Үүнд ОХУ-ын Засгийн газрын орлогч дарга А.Л.Оверчук уурлаж, яриа хэлэлцээгээ болих дээрээ тулсан байна. Тэрбээр “Та бүхэн өөрсдөө бодоод үз дээ. Бид энд урт хугацааны, стратегийн харилцаа байгуулах тухай ярьж байна. Гэтэл та бүхэн “одоо шалгалт явж байна, дуусмагц дансыг нээнэ” гэж хэлж байна. Ийм нөхцөлд ямар тогтвортой байдлын тухай ярих вэ. Хяналт, шалгалт хийж байгаа түншүүд маргааш Монгол Улсад газрын тосны бүтээгдэхүүн, хий нийлүүлэх үү, транзит тээврийг хангах уу?. Бид хийсвэр ертөнцөд амьдардаггүй. Манай хоёр улсын хооронд бодит бараа бүтээгдэхүүн,  эрчим хүч, тээвэр, эдийн засгийн харилцаа бий. Бид хүмүүсийн гэр орон өвөлдөө хэрхэн дулаан байх вэ, автомашинаа юугаар цэнэглэх вэ, үр тариа, хүнсээ хаанаас авах вэ гэдгийг бодох ёстой. Гэтэл бидэнд “шалгалт дуусна, дараа нь дансыг чинь нээнэ” гэж хэлж байна. Ийм байдлаар урт хугацааны харилцаа байгуулж болохгүй” хэмээн уурласан байдаг.

Энэ уулзалт болоод 10 орчим хоногийн дараагаас шатахуун хомсдож, иргэд наймдугаар сарынх шиг бензинд хонон, өнжиж очерлож эхэллээ.

Манай улс ОХУ-аас шатахууны 95 хувийн хараат. Олон улсын нөхцөл байдлаас шалтгаалж, шатахуун хомсдолтой, тасалдаж байгаа энэ цаг үед Монголбанкны дэд ерөнхийдөгч Г.Энхтайвангийн энэ тайлбар, хариултаас болж, улсаараа шатахуунгүй болох нөхцөл байдал үүсэв үү.