Х.Болорчулуун: Хөрөнгө оруулалтын хуульд мөнгөний босго байхгүй байгаа нь аюул дагуулна

УИХ-ын чуулганы өнөөдрийн хуралдаанаар Хөрөнгө оруулалтын тухай хуулийн төслийг /Засгийн газар 2023.06.23-ны өдөр өргөн мэдүүлсэн, хэлэлцэх эсэх/ хэлэлцэж байна.

Энэ үеэр УИХ-ын гишүүн Х.Болорчулуун “Хөрөнгө оруулалтыг хэн ч дэмжинэ. Гэхдээ энэ оруулж ирж байгаа хууль бол учир дутагдалтай байна. Нэгд, хөрөнгө оруулалтын босго алга байна. 100,000 ам.доллар байсныг 50,000 болгох гэж үзээд бөөн юм болсон. Энэ хуульд босго алга байгаа нь болгоомжлол төрүүлж байна. 10 тэрбум төгрөгийн хөрөнгө оруулсан хүнд тогтворжуулалтын гэрчилгээ өгөх юм байна. Энэ бага мөнгө, гаднын хүн монгол хүнээс илүү хөнгөлөлт авдаг байж таарахгүй” гэв.
Ч.Хүрэлбаатар сайд “Хөрөнгө оруулалтад босго тавьдаг 24-хөн улс байгаа. Африкийн улсууд байгаа. Энэ улс орныг хөгжүүлмээр байна, Х.Болорчулуун сайд аа. “Компани байгуулахын тулд 100,000 ам.доллар шилжүүлдэг. Тэрийг шилжүүлэх гэхээр гэхээр данс нээж өгдөггүй байхгүй юу. Тэгээд түр данс гэж нээж өгсөн. Гэтэл тэрийг нь авлига, мөнгө угаалт, терроризмтой тэмцэх хүрээнд тэр дансыг нь хаагаад хаячихсан. Энэ нь ч зөв. Хөрөнгө оруулагчид өөрсдөө ярьж байна. “Компани байгуулахгүйгээр мөнгө шилжүүлэх боломжгүй. Хүн гуйгаад шилжүүлэхээр залилуулах гээд байна” гэдэг асуудал тавьдаг. Энэ асуудлыг л шийдэж байгаа юм” гэв.
Х.Болорчулуун гишүүн харин Монгол Улс онцлогтой учир босго байх нь зөв гэсэн байр суурин дээрээ хатуу зогсов.