Боловсролын хууль багшийн нийгмийн асуудлыг шийдэж хөдөөд багш нарыг урин дуудаж байгаа
Англи хэлний багш нар хөдөөг зорих болжээ
Төв аймгийн Цээл, Угтаалцайдам суманд УИХ-ын гишүүн Г.Дамдинням хууль ажиллах үеэр багш нар англи хэлийг бага ангиас заах хуулийн шинэчлэлийг цаг үеэ олсон чухал заалт хэмээн үнэллээ. Хөдөөгийн хүүхдүүд цахим орчинд цаг өнгөрүүлэх нь нэмэгдсэнээр бага ангид элсэхдээ л англиар ганц хоёр үг хэлдэг, зарим нь бүтэн өгүүлбэр хэлэх дайны чадвартай болсон байна. Иймээс яг энэ үеэс нь эхлэн сурагчдад англи хэл зааснаар тэднийг чанартай, цэгцтэй гадаад хэлний чадварт суралцах суурийг бүрдүүлж, 12 дугаар ангиа төгсөхөд хотийн болон хувийн сургуулийн сурагчидтай ижил түвшний ур чадвартай болох боломжтой гэж орон нутгийн багш нар хэлж байлаа. Энэ талаар Төв аймгийн Цээл сумын цэцэрлэгийн багш Б.Гүнтэвтуяа “Би бол англи хэлийг бага ангиас нь үзэхэд асуудалгүй гэж бодож байгаа. Англи хэл бол дэлхийн хэл.” гэсэн юм.
Төв аймгийн Цээл сумын цэцэрлэгийн багш Б.Гүнтэвтуяа
Мөн Угтаалцайдам сумын ЕБС-ын бага ангийн багш Д.Ариунжаргал “Хүүхдүүд англи хэлийг багаасаа зөнгөөрөө сурч байна. Заримдаа сумдын багш бид чинь хүүхдүүдийнхээ өмнө гологдох шинжтэй. Нэгэнт англи хэл дэлхий нийтийн хэрэглээ болсон тул Г.Дамдинням гишүүн хуульд бага ангиас нь заахаар оруулж өгсөн нь зөв шийдвэр байсан. Харин багшлах боловсон хүчинг л сайн шийдэж өгөөрэй гэж хүсье. Боловсролын багц хуулиар багшийн нийгмийн асуудлыг шийдэж, хөдөөд багшийг урин дуудаж байгаа. Үүгээр англи хэлний олон багш хөдөөг зорих байх. Гэхдээ англи хэлний багшийн хангамжийг зөвхөн энэ зохицуулалтад найдахгүйгээр бусад арга хэрэгслээр одооноос анхаарч байх нь зөв” гэлээ.
Бага ангийн багш Д.Ариунжаргал
Хөдөөгийн иргэдийн хувьд хүүхэд нь суманд сурснаар хотын, тэр дундаа хувийн сургуулийн хүүхдүүдээс мэдлэг чадварын хувьд хоцрох вий хэмээх айдастай байдаг. Тэгвэл англи хэлийг хөдөө, хот ялгалгүй зааснаар боловсролын энэ зааг ялгаа бага ч болов арилж, ижил тэгш гарааны нөхцөл бүрдэх боломж нээгдэнэ хэмээн итгэж байгаагаа иргэд хэллээ.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна