ХОХИРОГЧИД: Газ дэлбэрч, 7 хүн амиа алдаж, 228 айл орон гэргүй болсон хэргийг НЭЭЛТТЭЙ шүүхийг хүсч байна

Одоогоос жил гаруйн өмнө буюу 2024 оны нэгдүгээр сарын 23-24-нд шилжих шөнө Дүнжингаравын  уулзвар дээр газ тээвэрлэж явсан  Дашваанжил компанийн том оврын машин осолдож, долоон хүн амиа алдаж, 200 гаруй хүн орон гэргүй болсон ноцтой осол гарсан.

Тодруулбал, нийслэлийн Баянзүрх дүүргийн 26 дугаар хорооны нутаг дэвсгэрт газ дэлбэрсний улмаас үүргээ гүйцэтгэж явсан гурван аврагч, явган болон автомашинаар зорчиж явсан дөрвөн иргэн нас барж, зургаан хүн хүнд гэмтэж, 35 хүн хөнгөн гэмтэж хохирсон байдаг. Мөн 36 тээврийн хэрэгсэл, гурван барилга байгууламж шатаж, 228 иргэн, 15 аж ахуйн нэгжид 5.4 тэрбум орчим төгрөгийн хохирол учирсан нь тогтоогдоод байгаа юм.

Тус хэрэгт Дашваанжил компанийн гүйцэтгэх захирал Н.Баатаржав, жолооч Ч.Рэнцэндорж нарыг яллагдагчаар татаад байгаа юм.

Уг хэргийн шүүх хурлын урьдчилсан хэлэлцүүлэг өнөөдөр товлогдсон ч хойшилжээ. Хохирогчид шүүхийн хэлэлцүүлэг болох талаар ямар мэдээлэлгүй байсан аж. Цахим орчноос мэдээлэл авч шүүхийн гадна цугласан хохирогчид дараах мэдээллийг өглөө.

Хохирогч Б: Осол гараад жил гаруйн хугацаа өнгөрлөө. Гэтэл бид өнөөдөр хохирогч бус нэхэмжлэгчээр явж байна. Шүүх хурал, хэрэгтэй холбоотой мэдээллээр хангахгүй байгаад гомдолтой байна. 

Осолд өртөж, эрүүл мэнд амь насаараа хохирч, олон хүн гэр оронгүй болчихоод байхад асуудлыг шийдэхгүй хэт удааширч байгаад гомдолтой байна. Гэр орондоо амар амгалан байж байгаад дэлбэрэлтэнд өртсөн. Гэтэл яагаад бид хохирогч бус нэхэмжлэгч болчихоод хамаг эрхээ хаалгаад явж байна вэ. Хуулийн байгууллага биднийг мэдээллээр хангахгүй байна. Прокурор дээр 2025 оны нэгдүгээр сард очиж уулзахад шүүх хурлын мэдээллийг өгөөгүй.

Хохирогч Н: Осол гаргасан Дашваанжилын жолооч сүү тээвэрлэж яваагүй шүү дээ. Дашваанжил компанийн ХАБ нь ажиллаагүй, жолооч нь наад захын арга хэмжээ аваагүй, өөрийн амиа л бодсон.

Өнөөдөр бидний хэлэх үг маань ч хязгаартай байгаа. Дашваанжил компани бүтэн хуулийн фирм хөлсөлж аваад бидний дуу хоолойг хүртэл хязгаарласан. Өнөөдөр 63 айлын 200 гаруй хүн сэтгэл санааны асар хүнд байдалтай байна. Хүүхдүүд ч доголон нулмистай явж байна.

Хоёр жил бүх зүйлээрээ хохирч байхад Дашваанжил компани хэвийн ажиллаад ашиг орлого нь нэмэгдээд явж байгаа. Асуудлыг ар, өврийн хаалгаар зохицуулаад сурчихсан юм байна. Бид эсээ хүртэл явна.

Хохирогч Г: Орон гэрээсээ салаад 406 хонож байна. Амьдралдаа бүтээсэн бүхнээ алдчихаад байна. Бидний байрны үнэлгээг ч үнэн зөв гаргаагүй. Хэт багаар үнэлсэн.

Олны нүдэн дээр гамшигт осолд өртсөн байхад хурдхан шийдээд өгөхгүй, сунжирсан урт хугацаа өнгөрч байгаад гомдолтой байна. Миний хувьд өмсөж байсан хувцастайгаа гарсан. Манай гэр бүлийн зургаан хүнд учирч байгаа хохирлыг тооцож хэлэхэд бэрх байна.

Хэргийг яагаад хурдан шийдэж өгөхгүй байгаа юм бэ. Бид Дашваанжил компани асуудлыг зориуд сунжруулж байна гэж үзэж байгаа.

Хохирогч Б: Би байр, машинаа шатаалгасан. Сэтгэл санаа маш хүнд байгаа. Үнэхээр гайхаж байна. Эзэн холбогдогч нь тодорхой байгаа. Шийдэхгүй явж явчихаад одоо “Чоно борооноор гэгчээр хохирогчдод мэдэгдэхгүй байрын үе тааруулаад шүүх хурлын хэлэлцүүлгээ зарласан байна. Дашваажилын ХАБ маш муу байсан. Машин шүргэх төдийд газ алдаад дэлбэрдэг байж болох юм уу.

Жолооч ХАБ-ын наад захын мэдлэггүй. Осол болоход ямар ч арга хэмжээ аваагүй. Цагдаад дуудлага ч өгөөгүй байж хажуугийн дэлгүүрийн хүнтэй яриад зогсож байсан. 12 жилийн өмнө Дарханд таван давхар байранд дэлбэрэлт болсон. Мөн л 200 гаруй хохирогчтой байсан. Нам дараад өнгөрсөн. Үүн шиг дарах гээд байгаа юм уу.

Дашваанжилын захирал Н.Баатаржав гэгч хоёр удаа уулзая гээд өөрсдөө ирээгүй. Нэг уулзалт дээр нь өмгөөлөгч нь ирээд хэдэн айл байсан бэ гэж байгаа юм. Тэд судалгаа авах гэж ирсэн юм уу. Биднээр даажигнаад байгаа юм л даа. Өнөөдрийг хүртэл олон хүний аминь хүрч, хэдэн зуун хүнийг хохироочихоод Дашваанжил компанийн захирал, удирдлагууд нэг ч удаа уучлалт гуйгаагүй.

Хуулийн байгууллага Дашваанжил компанийн талд ажиллаагүй л юм бол анхан шатны шүүх хурлыг нээлттэй явуулах ёстой. Энэ хүсэлтээ ч бид өгсөн” гэлээ.