“Зарлагдсан дайны оршил” буюу 70, 80-аад оныхны тэмцэл

Олны анхаарал АН-ын ҮБХ-ны хурал руу төвлөрсөн сиймхийгээр Ерөнхий сайд Г.Занданшатар тэргүүтэй МАН-ын томчууд намынхаа залуучуудын байгууллага болох НАМЗХ-ны үе, үеийн удирдлагуудыг “Их тэнгэр”-т дуудаж уулзсан. Гэхдээ энэхүү уулзалтад НАМЗ-ын удирдагчдын дунд хамгийн том байр суурьтай Л.Оюун-Эрдэнийг уриагүй нь хэлэлцэх гол асуудал нь “Намын даргын сунгаа” байсантай холбоотой гэж хэвлэлүүд бичиж байна. Үнэндээ ч тийм бөгөөд энэ үйл явдал нь ирэх сард товлогдоод байгаа МАН-ын Их хурал насны ялгаан суурилсан буюу үе, хоорондын тэмцэл маягтай өрнөнө гэдгийг дахин нэг удаа баталсан хэрэг боллоо.

Намын дарга Л.Оюун-Эрдэнийг огцруулж, улмаар Ерөнхий сайдын алыаа өгөхөд хүргэсэн МАН-ын Бага хурлын эхэнд заалны уур амьсгал Л.Оюун-Эрдэнийн талд, бараг 70 хувь нь үлдээх чигтэй байсан ч гэнэтхэн эргэчихсэн гэдэг. Тухайн өдөр Л.Оюун-Эрэдэнийн хүү О.Тэмүүлэн АТГ-т байцаалт өгч таардаг нь бас сонин тохиолодол. Ямартай ч Л.Оюун-Эрдэнэ гэнэт саналаараа бууж өгч, “Намайг битгий дэмжээрэй” гэж хүмүүс рүү мессеж бичсэн, тийм учраас л санал хураалтын дүн эсрэг гарсан гэх мэдээлэл хэвлэлд бичигдэж үлджээ.

УИХ-ын чуулган ч гэсэн, Ерөнхийлөгч орж ирж “загнаагүй” бол Засгаа авч үлдэх талд байсныг үзсэн хүмүүс нь санаж байгаа байх. Нөхцөл байдал тийшээ эргэсэн учраас ч Ерөнхийлөгч орж очсон нь тодорхой.

Түүний ар дээр Г.Занданшатарын Засгийн газар байгуулагдаж, тэр завсарт “Танхим бүрдүүлэх гол зарчим нь 70-аад оныхонд илүү итгэх гэнэ, 80-аад оныхоныг найдваргүй гэсэн гэнэ ээ” гэх яриа гарсан. Үнэний хувьтай байж мэдэхээр танхим ч бүрдсэн. 

Гэвч мэдээж хэрэг МАН-д залуучууд нь байсаар, амбийцаа тээсээр хоцорсон.   

Эндээс, “Залуус хэр удаан дарагдах вэ”, Их хурал дээр боломжоо ашиглах уу, Бага хурал дээр 70, 80 хувийн дэмжлэгтэй байсан юм бол “Их хурал дээр ямар байх вэ” гэдэг асуултууд гарах нь тодорхой. Ядаж байхад МАН-ын дүрмийн 24.3-т “Хэрвээ нам эрх баригч бол намын даргыг Ерөнхий сайдад нэр дэвшүүлнэ” гээд заачихсан байдаг.

Л.Оюун-Эрдэнэ, Д.Амарбаясгалан, Х.Нямбаатар нар хүчээ нэгтгэх, Г.Занданшатар залууст зулугуйдаж Дүлзэн хайх хамгийн том шалтгаан энэ. Ард нь мэдээж, албан тушаал амлалт, бялуу хуваалт гээд ард түмний дургүйг хүргэх зүйлс бүгд яваа.  

Г.Занданшатарын “Их тэнгэр”-т хийсэн уулзалт хэр үр дүнтэй болсныг одоо хэлэх боломжгүйн нэгэн адил, Л.Оюун-Эрдэнийн өчигдөр бичсэн “Худал хурдан ч үнэнд гүйцэтгддэг” гэх үг ч “Намайг худлаа гүтгэж байгаад ажлуудыг авсан, би буцаж ирнэ” гэсэн утгатай юу, ах нар залуусыг нь худал уяраан элсүүлж байгааг хараад бухимдсан цөхрөлийн илэрхийлэл үү гэдгийг ялгахад эрт байна.      

Гэхдээ нэг л зүйл тодорхой байгаа нь, МАН-ын “Дотор халуун” АН-ынхаас ч өндөр байна.