АН-ын даргад горилогчдын хэн нь хэн бэ

Өчигдөр болж өндөрлөсөн Ардчилсан намын Үндэсний бодлогын хороо /ҮБХ/-ны ээлжит бус хурлаас намын шинэ даргад нэр дэвшигчдийг бүртгэх 15 хүний бүрэлдэхүүнтэй хороог байгуулсан. Тус хороо одоогоор Б.Цогтгэрэл, Б.Пүрэвдорж нарыг бүртгээд байна. Тун удахгүй Ө.Шижир, Ж.Баярмаа нар бүртгүүлэх юм. Ингэснээр дээрх дөрвөн хүн АН-ын даргад өрсөлдөх юм. 

АН-ын “нүүр царай” болж буй Ж.Баярмаа 

Ж.Баярмаагийн хувьд АН-ын эмэгтэй лидерүүдийн нэг. Гишүүн болохоосоо өмнө намынхаа гал тогоонд  идэвхтэй ажилласаар иржээ.

Тэрбээр 1998-2000 онд МҮАН-ын дэргэдэх “Шинэ-Үе” залуучуудын байгууллагад Гадаад харилцаа хариуцсан Нарийн бичгийн дарга, 2000-2002 АЗХ-ны гадаад харилцаа хариуцсан Нарийн бичгийн дарга, 2000-2006 онд Чингэлтэй дүүргийн АН-ын хорооны гишүүн, 2002-2006 онд Говь-Сүмбэр аймгаас сонгогдсон АН-ын ҮЗХ-ны гишүүн, 2019- одоог хүртэл Завхан аймгаас ҮБХ-ны гишүүн, 2023 оноос АН-ын ҮБХ-ны Тэргүүлэгч, намын дэд даргаар ажиллаж байв. 

Товчхондоо, Ж.Баярмаа сүүлийн 26 жил улс төрийн үйл амьдралд оролцжээ. Ж.Баярмаа 1995 онд ГХДС-ийг англи хэлний орчуулагч-багш, 2003 онд МУИС-ийн Хууль зүйн сургуулийг эрхзүйч, 2024 онд МУИС-ийн Бизнесийн сургуулийг бизнесийн удирдлага, 2008 онд Япон Улсын Осакагийн их сургуулийг Нийгмийн ухааны магистр, 2016 оноос МУИС-ийн Олон улсын харилцаа, нийтийн удирдлагын сургуулийг /докторант/ тус тус дүүргэжээ. УИХ-ын гишүүнээр сонгогдсон цагаасаа С.Баярцогтын хүн хэмээн хэлэгдэж явсан ч өөрөө үгүйсгэсэн байдаг.

“Тэсо”-гийн О.Цогтгэрэл

1993 онд Увс аймгийн Тэс сумын 10 жилийн дунд сургууль, 1998 онд ТИС-ийн Компьютерын техник менежментийн сургуулийг эдийн засагч мэргэжлээр, 2008 онд Удирдлагын академийг магистр зэрэгтэйгээр төгсчээ.

ТЭСО ХХК-ийн захирал, 2012-2015 онд Монгол Улсын Ерөнхий сайдын зөвлөх, 2015-2017 онд Увс аймгийн Ардчилсан Намын дарга, 2015-2020 онд ТЭСО корпорацын ерөнхийлөгчөөр ажиллаж байв.
Харин 2020 оноос эхлэн хоёр дахь удаагаа Монгол Улсын Их Хурлын гишүүнээр сонгогдон ажиллаж байна. 

2020 онд Ардчилсан намын дарга хоёр хуваагдаж, тамгаа булаацалдсан. Ерөнхий сайд асан Н.Алтанхуягийн дэмжлэгээр улстөрд гарч ирсэн Б.Цогтгэрэл улмаар нэг даргаар нь тодорч байв. 
Тэрбээр Ц.Тувааны тал буюу Х.Баттулга, Н.Алтанхуяг нарын дэмжлэгтэйгээр Ардчилсан намын дарга болж үзсэн түүхтэй. 

Ховдын Б.Пүрэвдорж

Монгол Улсын Их Хурлын дэд дарга, Монгол Улсын Их Хурлын гишүүн Б.Пүрэвдорж 1994 онд Монгол улсын их сургуулийн Олон улсын харилцааны дээд сургуулийг англи хэлний багш, орчуулагч мэргэжлээр төгсчээ. 

Тэрбээр 1995-2009 онд Монгол улсын Гаалийн ерөнхий газрын харьяа Баян-Өлгий, Буянт-Ухаа, Улаанбаатар хот дахь гаалийн газарт байцаагч, албаны дарга, 2009-2012 онд Ховд аймгийн Ардчилсан намын дарга, 2012-2014 онд Гадаадын иргэн, харьяатын асуудал эрхлэх газрын дарга, 2014-2015 онд Иргэний харьяалал, шилжилт хөдөлгөөний ерөнхий газрын даргаар ажиллаж байв. 

2016 оноос хоёр дахь удаагаа Монгол Улсын Их Хурлын гишүүнээр сонгогдон ажиллаж байна. Англи, Орос хэлтэй.

Х.Баттулгын хүн гэгддэг Ө.Шижир

80 оны намын залуусаа төлөөлж УИХ-ын гишүүн Ө.Шижир АН-ын даргад өрсөлдөхөөр болжээ. Тэрээр 2007 оноос хойш өнөөдрийг хүртэл нийт 18 жилийн хугацаанд АН-д хүчин зүтгэсэн бөгөөд намын бүх түвшинд ажиллаж байсан. 

Тухайлбал, Ерөнхийлөгчийн Тамгын газрын дарга, АН-ын тэргүүн дэд дарга, Ардчилсан залуучуудын холбооны дэд ерөнхийлөгч зэрэг удирдлагын түвшинд ажиллаж байсан туршлагатай нэгэн юм.