Ардчилсан намын Үндэсний бодлогын хороо/ҮБХ/-ны хурал Төрийн ордонд болж байна.
Хурлын эхэнд Ардчилсан намын Дотоод сонгуулийн хорооны дарга С.Эрдэнэболд “Ардчилсан намын даргад нэр дэвшихээр УИХ-ын гишүүн, УИХ дахь АН-ын бүлгийн дарга О.Цогтгэрэл, УИХ-ын гишүүн, УИХ-ын дэд дарга Б.Пүрэвдорж, УИХ-ын гишүүн Ө.Шижир, УИХ-ын гишүүн Ж.Баярмаа, АН-ын ҮБХ-ны гишүүн Б.Отгонбат нарын таван хүн нэрээ дэвшүүлэхээр материалаа өгсөн. Тэдгээрээс Ардчилсан намын даргын сонгуультай холбоотой зардлыг бусад нэр дэвшигчидтэй хуваан гаргах журмыг зөрчсөн УИХ-ын гишүүн Ө.Шижирийг нэр дэвшигчээр бүртгэхээс татгалзсанаар үлдсэн дөрвөн хүн намын даргын суудлын төлөө өрсөлдөхөөр тунаж үлдсэн” болохыг танилцуулсан.
Дараа нь ҮБХ-ны гишүүн, хуульч Г.Эрдэнэбат нэмэлт мэдээлэл хийснээр хуралдаан эхэлж, үргэлжилж байна.
ҮБХ-ны 383 гишүүн дээрх нэр дэвшигчдээс нэгийг нь намаа удирдуулахаар сонгох болно. ДСХ-ны дарга С.Эрдэнэболдын онцолсон тэрхүү аавын хүү, ээжийн охин нь хэн байх вэ. Мэтгэлзцээний үеэр МАН-тай хамтарч, эвсэж ажиллахаа илэрхийлсэн О.Цогтгэрэл, Б.Пүрэвдорж уу, үзэл баримтлал нь МАН-тай эвсэх ямар ч боломжийг олгоогүй гэдэг дээр бат зогссон Ж.Баярмаа, Б.Отгонбат нар уу. ЭНэ асуултын хариу удахгүй тодорхой болно.
ҮБХ даргыг тодруулсны дараа “UG arena”-д намын их хурал үргэлжлэн хуралдаж, намын даргыг батламжилна.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна