Л.Мөнхбаясгалан: Миний улс төр дөнгөж эхэлж байна, өмнө минь мөн ч олон сонгууль байна даа

АН-ын ҮБХ-ны гишүүн Л.Мөнхбаясгалангаас сэтгүүлчид намын даргын асуудлаар байр суурийг сонирхжээ. Тэрбээр уг асуултад “Миний хувьд Үндэсний бодлогын хорооны хурал эхэлсэн өдөр бид хэлэлцэх асуудлынхаа дарааллыг баталсан. Түүндээ Намын даргыг сонгох журамд ямар ч өөрчлөлт оруулахгүй байхаар тохирсон. Тэгэхээр олонхио дагах ёстой.  Би ганцаараа эсрэг саналаа өгсөн, гэхдээ олонхоо дагана.

Дээд шүүхэд бүртгэлтэй ямар дүрэм журам байна, түүнийгээ л дагах ёстой. Заалнаас ямар нэгэн горимын санал хураах ёсгүй. Би тэр саналаа хэлсэн, гишүүд дэмжсэн.

Б.Пүрэвдоржийн хувьд УИХ-ын дэд дарга, О.Цогтгэрэл бол АН хуваагдсан, дээд шүүхэд бүртгүүлж чадахгүй байхад орон нутгаар явж, ард түмнээс даргаар сонгогдсон хүн гэдгийг мэдэж байгаа байх.

Ж.Баярмаа гишүүний хувьд өндөр боловсролтой,  шударга, эмэгтэйчүүдийн манлайллыг харуулж байгаа. Б.Отгонбат бол залуу хүн. Барууны үзэл баримтлалтай, түүнийгээ үндэсний онцлогтой хольж явах хүн юм уу гэж харсан.

АН-ын дараагийн дарга бол ялагчийн сэтгэлзүйтэй хүн байх ёстой. МАН-аас юм гуйдаг байж болохгүй. Дээр нь талцлыг алга болгох ёстой. Ард түмэндээ нэр нүүртэй байх ёстой. Миний хувьд сонголтоо хийсэн, энэ дотор яг ийм юм ярьж байгаа нэг л хүн байгаа” хэмээн байр сууриа илэрхийлсэн.

Дараа нь тэрбээр сэтгүүлчийн асуугаагүй сэдэв болох өөрийнхөө талаар ярьж, “ҮБХ-ны гишүүнээр дөрвөн жил ажилласан хүн намын дарга болох ёстой” гээд сая баталчихлаа. Энэ бол богино хугацаа, миний УИХ-ын гишүүний бүрэн эрхтэй л хамт дуусна. Миний улс төр дөнгөж эхэлж байна, цаана нь дахиад 20 жил байна. Мөн ч олон сонгууль байна даа” гэсэн нь анхаарал татлаа.