Н.Ганибал: Шинэ дүрмээр, АН-ын гишүүн УИХ-д нэр дэвших хүсэлтээ 24 сарын өмнө өгдөг болно

Ардчилсан намын Үндэсний бодлогын хороо зохион байгуулалтын асуудал хэлэлцэж, О.Цогтгэрэлийг намын даргаар сонгон, батламжлуулахаар Их хуралд оруулахаар болсон билээ. Тэгвэл ээлжит бус Их хурлаар хэлэлцэх бас нэгэн чухал асуудал бол шинээр батлагдсан Улс төрийн намын тухай хуульд нийцүүлсэн Үндсэн дүрмийг хэлэлцэн батлах юм.

Намын Ерөнхий нарийн бигийн дарга Н.Ганибалаас энэ талаар тодруулахад “Намын ээлжит бус их хурлаар намын даргын сонгуульд ялсан О.Цогтгэрэлийг Ардчилсан намын даргаар батламжилна.

Мөн намын Үндсэн дүрмийг хэлэлцэж батална. 2024 оны сонгуульд нэр дэвшигчдийг тодруулах манай намын өмнөх хурал нэлээд бужигнаантай болсон байдал харагдсан. Тэгвэл цаашид ийм зүйл болохгүй. Тодруулбал, УИХ-д нэр дэвших хүсэлтэй Ардчилсан намын гишүүн нь хүсэлтээ 24 сарын өмнө өгөх, улмаар 24 сарын хугацаанд нам болон академиас өгсөн үүрэг даалгавруудыг биелүүлэх, улмаар судалгаагаар өндөр рейтингтэй нь тогтоогдсон тохиолдолд нэр дэвших маш тодорхой, детальчилсан зохицуулалтыг шинээр боловсруулсан  Үндсэн дүрэмд оруулж өгсөн байгаа.

Л.Гантөмөр Хамтарсан Засгийн газрын үйл ажиллагаа доголдсонтой холбоотойгоор өөрийн хүсэлтээр ажлаа өгсөн. Гэхдээ энэ хугацаанд Ардчилсан намыг эв нэгдэлтэй, нэг зүг рүү харсан нам болгож чадлаа.

Шинээр сонгогдсон О.Цогтгэрэл хэлсэн үгэндээ энэ цаг хугацааг “Шинэ бодлогын, шинэ эргэлтийн цэг” гэж тодорхойлж байна. Төсөв хүндэрсэн, энэ цаг хугацаанд шилдэг эдийн засагч, Инженер хүн нам удирдах болсонд баяртай байна. Мөрийн хөтөлбөрөөс нь харахад 2028 оны сонгуульд шилдэг хүмүүсээ илгээж, реформ хийх даргатай боллоо гэж бодож байна.

Үндсэн дүрэм боловсруулах явцад 5000 гаруй гишүүд дэмжигчдийн саналыг тусгасан. 21 аймаг, есөн дүүргээрээ бүгдээр нь явсан. 333 сумаас бүгдээс нь төлөөлөл орохоор зохион байгуулсан. Тиймээс чамбай дүрэм болсон. Их Хурлын төлөөлөгч нар маань санал нь тусаж уу, үгүй юу гэдгийг нягталж үзээд дүрмээ батлах байх гэж найдаж байна” гэлээ.