Тойргоосоо ч гарч чадаагүй Г.Занданшатарт МАН-ын гишүүд даргын суудлаа өгөх үү

Монгол Улсын Ерөнхий сайдаар Г.Занданшатар томилогдоод гурван сар орчим болж байна. Угтаа бол түүнийг Ерөнхий сайдаар сонгогдсон даруйд МАН-ын Бага хурал хуралдаж, дараагийн намын даргаа сонгох ёстой байсан боловч өдийг хүртэл учир битүүлгээр хойшилсоор байна. 

Уг нь Ерөнхийлөгчийн фракцийн зүгээс Г.Занданшатарыг намын даргад зүтгүүлж байгаа. Гэсэн ч  нэр хүнд нь нийгэмд ч, нам дотроо ч муу байгаатай холбоотойгоор Их хурлыг "хайрцаглах" ажил хүндэрч, улмаар хойшилж байгаа гэгдэж буй.

Өөрөөр хэлбэл, МАН-ын Их хурал хойшилж байгаагийн гол шалтгаан нь 70, 80-аад оныхны тэмцэл гэхээсээ илүү Г.Занданшатар өөрөө болчихоод байгаа гэсэн өнцөг жин дарж ирлээ. "Сонгуульд ялаад гараад ирсэн, нэр хүнд сайтай бол хамаа алга" гэсэн яриа намын дотоодод илт чангарсныг эх сурвалжууд хэлж байна.  Үнэхээр ч олигтойхон нэгэн байсан бол шууд Их хурлаа даруйхан зарлаад нэр төртэйгөөр намын тамгаа авах байсан гэдэг үнэний хувьтай. 

У.Хүрэлсүх МАН-ын генсекээр өөрийн хуурай дүү Я.Содбаатарыг томилуулж чадсан. Одоо Г.Занданшатарыг намын дарга болгож чадвал нам, төрийг хослон барих хэмжээлшгүй эрх мэдэлд хүрнэ гэгдэж буй. Энэ ч үнэний хувьтай. Үнэний хувьтай учраас ч гараагүй үр дүнгээс айж, намын даргад өрсөлдөх зоригтон гарч ирэхгүй байгаа гэсэн яриа ч явж байна.  

Г.Занданшатарын хувьд 2013 онд МАН-ын генсекээр ажиллаж байхдаа намынхаа нэр дэвшигчийг Ерөнхийлөгчийн сонгуульд ялагдуулж, улмаар хариуцлага хүлээн ажлаа өгч байсан түүхтэй. Томсгосон тойрог гэдэг утгаараа багийн тоглолт болж өнгөрсөн 2024 оны УИХ-ын сонгуульд Хангайн бүсэд багаа удирдаж орсон ч өөрөө ялагдаж, багаа ч ялагдуулсан. Нэг үгээр түүнд хувь нэр дэвшигчийнхээ хувиар УИХ-ын сонгуульд ялсан түүх л байдгаас намын түвшинд хариуцлага хүлээгээд ялсан түүх үгүй юм. 

 Ерөнхий сайдын 100 хоногийн тайлан дээр бодитоор хийсэн нэг ч ажилгүй, зуу, зуун хоосон амлалт, биелээгүй тушаал, шийдвэрүүдтэй, байгуулсан Засгийн газар нь олигтой нэр хүндгүй орж таарах нь тодорхой болж байна.

Тиймээс, түүнд хичнээн №01-ийн нөлөөлөл байсан ч Их хурлаас дэмжлэг авахад амаргүй байх нь тодорхой байна. 

Их хурлын гишүүдийг дээрээс нэр заагаад ч  "Тойргоосоо ч гарч чадаагүй нөхөр гэнэт тооноор орж ирээд намын даргыг чинь авч болохгүй" гэдэг шалтгаан яалт ч үгүй том. Тийм ч учраас Г.Занданшатарын хувьд МАН-ын даргын суудал тийм ч “АМАРХАН БООРЦОГ” биш болж хувирна.

МАН-ын школа-оор ч тэр Г.Занданшатарын хувьд намын дарга болж шагнагдах нь битгий хэл Спикерийн өндөр зиндаанаас сонгуульд баг авч орчихоод багаа ялагдуулсандаа хариуцлага тооцуулж, тойргийн гишүүдээсээ уучлалт хүсэж шийтгүүлэх учиртай нэгэн.

Г.Занданшатараар туг хийвэл ирэх 2027, 2028 оны сонгуулиудад МАН ялагдаж, О.Цогтгэрэл АН-ын дарга болохдоо тунхагласан "Ардчилсан намын дараалсан ялалт" бодит болох тийшээгээ хандана гэдгийг эрх биш МАН-ын олон гишүүд ойлгож байгаа нь лав.