“Ах”-ын сануулга буюу улстөрчдөд үйлчлэх АТГ

МАН-ын Нарийн бичгийн дарга Ц.Чулуунзагдын гэрт өчигдөр АТГ нэгжлэг хийжээ. Улмаар түүнийг 48 цагийн хугацаатай саатуулсан байна. 

Түүний хувьд УИХ-ын дарга Д.Амарбаясгаланг МАН-ын Ерөнхий нарийн бичгийн дарга байхад Нарийн бичгийн даргаар ажиллаж байсан, хамгийн ойрын хүн нь гэгддэг. 

Тиймээс энэхүү үйл явдлыг МАН-ын Их хурал ойртож, даргын суудлын төлөөх тэмцэл хурцадсаны шинж хэмээн улс төрийн хүрээнд ярьж байна.

Тодруулбал, УИХ-ын дарга Д.Амарбаясгалан МАН-ын даргад нэрээ дэвшүүлэхээр шийдсэн тул Г.Занданшатарыг энэ суудал руу түлхэж буй Ерөнхийлөгч У.Хүрэлсүх Ц.Чулуунзагдаар дамжуулан сануулга өгч байгаа нь энэ гэж байгаа юм.

Ерөнхий сайд Л.Оюун-Эрдэнийг огцруулах үед АТГ орлого нотлох ажлыг удаашруулаад байгаа мэт эс үйлдэл гаргаж байсныг олон нийт анзаарсан ч “Л.Оюун-Эрдэнэ өөрийн томилсон хүн болох АТГ-ын дарга З.Дашдаваад нөлөөлж, орлого нотлох ажлаа удаашруулж байна” гэсэн суртал ухуулгыг Засаг огцруулах жагсаал зохион байгуулагч залуусын зүгээс идэвхтэй түгээж байсан. 

АТГ-ын даргыг Ерөнхий сайд томилдог нь үнэн ч З.Дашдавааг Ерөнхийлөгч У.Хүрэлсүх Ерөнхий сайд байхдаа томилсон, сая улирахад нь Ерөнхий сайдад нөлөөлж, “хөтөлж явах шахаж байгаад улираасан байдаг. Тэгвэл энэ үйл явдал АТГ хэний талд ажиллаж байгааг харуулах нэг кэйс боллоо гэж үзэх хүмүүс байна.

АТГ өнгөрсөн сард УИХ-ын гишүүн С.Ганбаатарыг 10 гаруй жилийн өмнө МҮЭХ-ны ерөнхийлөгч байх үеийнх нь хэргээр шалгахад сэжигтэн өөрөө “Намайг Ерөнхийлөгчийн сонгуульд өрсөлдөх магадлалтай учраас шалгаж байна” гэж хэлсэн байдаг. Хэрэг хуучирдаггүй. Буруу зүйл хийсэн бол хариуцлагаа хүлээх л ёстой.

 Гэвч улстөрчидтэй холбоотой хэргүүдийг хэдэн жилээр хав дарж, эс үйлдэхүй үзүүлж байснаа улс төрийн эгзэгтэй нөхцөл байдалд гаргаж ирж, үйл явцаа хэвлэл рүү шидэж байгаа зэргээс АТГ үнэхээр улстөрчдөд үйлчилж байна уу гэдгийг эргэцүүлж бодох, анзаарч харах сэдэл төрөхөд хангалттай үйл явдал богино хугацаанд болж өнгөрлөө.

 Энэ удаагийн үйл явц ч ялгаагүй дээрх хардлагыг дагуулж байна.