П.Наранбаярын боловсролын салбарт хэрэгжүүлэх бодлого

Л.Оюун-Эрдэнийн шинэ Засгийн газарт багтаж, Боловсролын сайдаар томилогдсон П.Наранбаяр эрчтэй ажиллах боллоо дог. Түүний хувьд долоодугаар сарын 10-нд экс сайд Л.Энх-Амгалангаас тамгаа хүлээж авч,  ес хоногийн дараа анхны тушаалаараа ЕБС-ийн хичээлийн жилийг гурван улиралтай байхаар баталсан байдаг. 

Төрийн өмчийн ерөнхий боловсролын сургуулийн менежментийг сайжруулах төслийн багийг хүлээн авч уулзаад ч амжиж. Өчигдөр /2024.07.22/ анхны шуурхай хурлаа зарлан хуралдаж, боловсролын салбарт хэрэгжүүлэх бодлогоо ярьжээ.

Тус хурлаар Их, дээд сургуульд элсэх ЭЕШ-ын босго оноог нэмэгдүүлэх асуудлыг хэлэлцсэн байна. 

Мөн:

• Хөдөлмөрийн зах зээлийн эрэлтэд үндэслэн төрийн өмчийн их, дээд сургуульд зарим мэргэжлийн квотыг бодлогоор нэмэгдүүлэх
• Төрийн өмчийн их сургуулиудад сургалтын 20% орчмыг англи хэлээр оруулахыг зорьж ажиллах
• Төрийн өмчийн их, дээд сургуулийн академик үйл ажиллагааг бие даалгаж, төгөлдөржүүлэхэд бодлогоор дэмжих
• Боловсролын зээлийн сангийн сонгон шалгаруулалтыг бүрэн цахимжуулж, хүнээс үл хамааран ажиллах журмыг шинэчлэх
• Ахлах сургуулийг төрөлжүүлэн хөгжүүлэх
• Сурах бичгийн агуулга, сургалтын хөтөлбөр шинэчлэл дээр салбарын шүүмж, зөвлөмж тал дээр идэвхтэй ажилладаг мэргэжилтнүүдийг орж ажиллах боломжийг нээж өгөх
• Цэцэрлэгийн хүүхдийн өдрийн хоолны мөнгийг нэмэгдүүлэх замаар хүүхдийн өсөлт, хөгжлийг дэмжих (одоо өдрийн 3000₮), тус нэмэгдүүлэх дүнг эцэг, эхчүүд хуваалцдаг болох хуулийн заалтыг хэрэгжүүлэх
• Багш, сургалтын ажилтнуудыг хамран сургах тойрогт сэлгэн ажиллуулах
• Багшийн цалин, гүйцэтгэлийн үнэлгээнд багш өөрөө оролцдог системийг нэвтрүүлэх асуудлыг хэлэлцэж, Засгийн газрын хуралдаанд танилцуулах түвшинд бэлтгэх чиг үүргийг холбогдох газар, газрын дарга нарт үүрэг болгосон гэнэ.

Э.БУЛГАН