Л.Оюун-Эрдэнийн Засгийн газрын бугшсан "идээ, бээр" шахагдаж эхэллээ

-А.Отгонбаатар өндгөө Л.Оюун-Эрдэнэ, Л.Энх-Амгалан хоёр руу шидэх байсан юм-

Боловсролын салбарт багшийн хомсдол нүүрлэж, бага, дунд боловсролын түвшинд гэхэд 4200 багш яаралтай шаардлагатай болсон гэх аюулын харанга дэлдсэн мэдээг Боловсрол, шинжлэх ухааны сайд П.Наранбаяр олон нийтэд дуулгаж, мэргэжлийн боловсон хүчнийг 45 хоног мэргэшүүлж, багшаар ажиллуулах шийдэл танилцуулсан билээ. 

Гэтэл эрх баригчдын удтал нуусан энэ байдлыг олон нийтэд ил зарлаж, шийдэл гаргасан хүн болох П.Наранбаярын хэвлэлийн хурал руу Үнэн ба зөв намын дарга А.Отгонбаатар дайран орж, нүүр рүү нь өндөг шидэж тэнэгтэв. 

Зүй нь, тэр өндгөө Ерөнхий сайд Л.Оюун-Эрдэнэ, УИХ-ын гишүүн Л.Энх-Амгалан хоёр руу шидсэн бол арай шударга байх байв. Уг угшлыг нь хөөвөл бүр өмнөх үе рүү явах нь тодорхой ч П.Наранбаяр шиг шийдэл гаргаад зоригтой хөдлөөгүйд нь тэднийг буруутгах бүрэн үндэстэй. 

Багшийн мэргэжлээр суралцсан оюутнуудыг төлбөрөөс чөлөөлж, орон нутагт тодорхой хугацаанд ажиллуулах болзол тавьсан нь нэг шийдэл, гавьяа мөн ч хүүхдүүдийнхээ ирээдүйг бодоод П.Наранбаяр шиг зоригтой хөдлөөгүй, дээрх дурдсан шийдлийнхээ үр дүнг үзтэлээ нэг багшид ногдох хүүхдийн тоог нэмэх, илүү цагийн мөнгөөр нь багш нарыг өөр чиглэлийн хичээл заалгах зэрэг арга хэрэглэж, өөртөө "гал авахаас" айсан. 

Ингэхдээ эхний шийдлээ хэт сурталчилж, нүдэн дээр нь ил байсаар атал боловсролын салбарт бүх зүйл сайн сайхан байна гэж эцэг, эхчүүд хүртэл итгэхээр сурталчилж байлаа. Гарсан жаахан галыг нь "Жил бүр 2000 багш дутагддаг ч явцын дунд арилдаг" гэх мэт мэдэгдлээр дарж, иргэдийн оюун санааг ирээдүйд байлгасаар сонгуульд ялсан. Харин хаа очиж сонгуулийн үр дүн наанатай, цаанатай гарснаар Хамтарсан Засгийн газар байгуулагдсан. Пи араар далдалсан идээ бээр нь сөрөг хүчний тэргүүлсэн яамдаас эхлээд шахагдаж байна. 

Ер нь МАН сонгуульд ялсан нь бугшсан идээ бээрээ сайтар нуусных, ялаад хамтарсан Засаг байгуулсан нь өмнө бугшсан идээ бээрийг ганц өөрсөд дээрээ биш, бусад дээр ч асгаж, ирэх сонгуульд ялах зама засах санаа байсан ч байж мэднэ. Хамгийн асуудалтай яамдыг сөрөг хүчинд өгсөн.

Найман жил лай ланчиг хураасан хэр нь сайтар нууцалсаар сонгуульд ялна, хураагдсан лай ланчгаасаа хоёр сөрөг хүчиндээ өгч үүрүүлчихээд, өндгөөр шидүүлэхийг нь харсан шиг суух нөхцлийг бүрдүүлнэ гэдэг нарийн ухаан шүү. 

Гэхдээ, нэг тодорхой зүйл нь, ужгирсан тогтолцоогоор явсаар дампуурахад ойртсоноо зарлах салбар ганц боловсролоор тогтохгүй. Хэт олон салбар боловсролын араас замнаад ирэхээр тэнэг хүн ч "Ер нь болж бүтэж байсан юм байгаа юм уу, ямар намд саналаа өгчихөв өө" гэж ухаарах нь гарцаагүй. Асуудал ерөнхийдөө "Үнэн байдлыг нууж, төрийн эрхийг хууль бусаар авсан" гэдэг чигт л явна гэсэн үг.