А.Ариунзаяа: Засгийн газраас оруулж ирсэн асуудлыг хэлэлцэх үед “Давхар дээлтэй” гишүүд асуулт асуухгүй

УИХ-ын Ёс зүй, дэгийн байнгын хороо Ерөнхий сайд, Засгийн газрын гишүүнээр томилогдсон Улсын Их Хурлын гишүүн чуулганы ажиллагаанд оролцох журам батлах тухай асуудлыг хэлэлцэж байна.

Журам боловсруулах Ажлын хэсгийг төлөөлж УИХ-ын гишүүн А.Ариунзаяа “Засгийн газраас оруулж ирсэн асуудлыг хэлэлцэх явцад Засгийн газрын гишүүн, УИХ-ын гишүүнээр давхар ажилладаг гишүүнийг асуулт асуухгүй гэдгийг УИХ-ын дарга индрээс хэлдэг байсан бол одоо журамд оруулж өгсөн. Өөрөөр хэлбэл, танхимын зарчмаар боловсруулж, зарчмын зөрүүтэй саналаар асуулт, хариулт авч УИХ-д оруулж ирсний дараа “За би одоо УИХ-ын гишүүнийхээ хувиар үг хэлье” гэж эсэргүүцсэн агуулгатай үг хэлээд байх нь зарчимгүй асуудал юм аа.

Түүнчлэн, Засгийн газрын гишүүн хэдий их ажилтай ч УИХ-ын чуулган, Байнгын хорооны хуралд суух үүрэгтэй” гэсэн зохицуулалтыг суулгаж өгсөн” гэсэн тайлбар өгсөн. Дараа нь УИХ-ын гишүүн Ч.Лодойсамбуу “Үндсэн хууль зөрчсөн журам баталчих вий дээ. Үндсэн хуульд “УИХ, Засгийн газрын үйл ажиллагааг хуулиар зохицуулна” гэж заасан байдгийг зөрчиж байгаа юм биш үү. УИХ-ын гишүүн ард түлмний элч төлөөлөгч байтлаа УИХ-ын чуулганд үг хэлэх эрхгүй гэж юу гэсэн үг вэ” гэв.

А.Ариунзаяа энэ асуултад хариулсны дараа Б.Баярбаатар гишүүн “УИХ-ын гишүүн ард түмний элч төлөөлөгч мөн. Харин Засгийн газрын гишүүн бол биш. Хэрвээ Ч.Лодойсамбуу гишүүний асуусныг хөөвөл Сангийн сайдыг ашиг сонирхлын зөрчилтэй гээд Төсвийн байнгшын хороонд оруулдаггүй асуудал ч хуулийн зөрчил рүү татагдах магадлалтай. Яагаад гэвэл Сангийн сайд УИХ-ын гишүүн ард түмний төлөөлөгч мөн үү гэвэл мөн шүү дээ” гэж тайлбар хийв.