Т.Доржханд: ХҮН нам хэн нэгний халаасанд ордог нам биш

УИХ-ын гишүүн Ө.Шижир УИХ-ын чуулганы үеэр ХҮН нам сонгуулиар 1.9 тэрбумын санхүүжилт авсан талаар дурдаж  үүнийг хуульчилсан авлигал хэмээн өөрийн байр сууриа илэрхийлсэн юм. 

Энэ асуудлаар бид Шадар сайд Т.Доржхандаас тодрууллаа.

Тэрбээр, "ХҮН нам MCS-ээс 1 тэрбум 45 сая төгрөгийн хандив авсан нь үнэн.

Улс төрийн намын санхүүжилт шилэн ил тод байх ёстой. Дээрээс нь тохиролцоон дээр хандив өгч авна гэдэг зүйлийг хүн нам хийдэггүй юм.  Тийм ч учраас бид ил тод байдаг. Манай намд хандив өгөөрэй гээд дансаа байршуулсан. Орж ирсэн хандив нь л тэр байлаа.

Х.Баттулга гэдэг хүн ч бай Ж.Оджаргал гэдэг хүн ч бай ордынхоо асуудлыг хэлэлцүүлэх хэрэгтэй гэхээр зөрүүлээд л та нар Ж.Оджаргалын компаниас мөнгө авсан байна гэдэг зүйлийг гаргаж ирж байгаа юм л даа. Ийм өчүүхэн байж болохгүй. ХҮН нам хэн нэгнээс хараат бусаар үйл ажиллагаа явуулдаг.

Гэхдээ тэр компани чинь олон хүнд л хандив өргөсөн байна лээ. ХҮН нам хэн нэгний халаасанд ордог нам биш. Ер нь парламентад ХҮН нам орж ирснээр авилгын асуудлууд ил тод болсон нь бодит үнэн шүү.

-Тэгвэл таны хувьд Төгрөг нуурын ордтой холбоотой асуудал дээр ямар байр суурьтай байна вэ?

-Ирэх долоо хоногийн Засгийн газрын хуралдаанаар энэ асуудал хэлэлцэгдэнэ. Тэр үед би байр сууриа илэрхийлнэ.

Бид орд тойроод л хэрүүл хийгээд явахаар том төслүүдээ урагшлуулж чадахгүй байна. Энэ бидний алдаа л даа. 

-Сонгуулийнхаа санхүүжилтийн 98 хувийг авчхаад тэр компаниас хараат бусаар ажиллаж чадах уу?

-ХҮН намд хандив өгсөн хувь хүн болоод хуулийн этгээдүүдэд ямар нэгэн амлалт өгөөгүй. Бид нарын гаргах ямарваа нэгэн шийдвэр тухайн компанитай холбоогүй хараат бус байна гэдгийг албан ёсоор хэлье" гэлээ.