О.Отгон: Х.Баттулга бүрэн эрхээсээ татгалзаж шалгуул

Монгол ялна хөдөлгөөний зүгээс УИХ-ын гишүүн Х.Баттулгын Төгрөг нуурын ордыг баялгийн санд буцаан авах талаар шаардлага хүргүүллээ. 

Иргэн О.Отгон: "Х.Баттулгыг Монгол тулгатны зуун эрхэмд ороод уйлахад нь дагаад л мэгшдэг байлаа шүү дээ. Бид тэгж л тархиа угаалгадаг байлаа. Одоо Х.Баттулгыг дэмжээд байх шалтаг шалтгаан алга. Ард түмэн төгрөг нуурын ордоо авъя. 

Цус ярьж, бид нараар Хятадыг үзэн ядуулдаг хүн өөрөө Хятадтай найр тавьж, тэрбум тэрбумаар нь мөнгө олдог. Энэ ариун явдал юм уу?

Нэгдүгээрт Х.Баттулга бүрэн эрхээсээ татгалзаж хуулийн байгууллагаар шалгуул. Хоёрдугаарт стратегийн ач холбогдол бүхий Төгрөг нуурыг өөрийн гэр бүл, хамаарал бүхий этгээд, гадаадын хамсаатан түншүүдээрээ дамжуулан үндэстэн дамнасан санхүүгийн схем үүсгэж, оффшор компани байгуулан Хятад иргэдэд 250 сая ам.доллараар зарсан нь хөдөлшгүй баримтаар нотлогдож байна. 

Тиймээс энэ ордыг буцааж өг. Энэ бол Монголын ард түмний өмч. Төгрөг нуурын ордыг зарсан 250 сая ам доллараа өнөөдрийн ханшаар буюу 875 тэрбум төгрөгөө өг. Үүнийг бид нэхэмжилж байна. 

Монголчуудыг хохиролгүй болгож төрд 34 хувиа өг. Бидний шаардлагыг эс биелүүлбэл биелүүлэх хүртэл нь тэмцлийн дараа дараагийн хэлбэрт шилжих болно. 

Яг үнэндээ манай хөдөлгөөнийхөн Х.Баттулгыг цаг үргэлж дэмжиж байсан. Гэхдээ одоо үнэхээр дэндлээ. Энэ хүнийг шалгуулах ёстой газраар нь шалгуулах ёстой" гэлээ.