Г.Занданшатарын Засгийн газар огцрох эсэхийг өнөөдөр /2025.10.13/ Төрийн байгуулалтын байнгын хороо, УИХ-ын чуулганаар хэлэлцэж шийдвэрлэнэ.
Өнгөрсөн баасан гарагт шийдвэрлэчих асуудал чухам юунаас болж хойшилсон нь анхаарал татаж буй бөгөөд эх сурвалжийн мэдээлж буйгаар АН-ын дийлэнх олонх гишүүд Засгийн газрыг огцруулахгүй байх сонирхолтой байгаа гэнэ.
АН-ын дарга О.Цогтгэрэл эртнээс л Ерөнхий сайд Г.Занданшатартай нэр холбогдож, Засгийн газарт хамтрах асуудал хөндөгдөж байсан. Тиймдээ ч Ерөнхий сайдын асуудлаар АН-ын бүлэг өнөөг хүртэл тодорхой шийдвэр гаргаж чадаагүй байна. Магадгүй эл эс үйлдэхүй нь ч Ерөнхий сайдыг огцруулахгүй байх зорилготой байх вий гэх хардлага улс төрийн хүрээнд яригдаж буй.
Үүнтэй холбогдуулан АН-ын дарга О.Цогтгэрэл намынхаа УИХ-ын гишүүдтэй биечлэн уулзаж УИХ-ын даргыг огцруулах бичигт гарын үсэг зуруулсан гэдгийг эх сурвалж мэдээллээ.
Тэгэхээр эндээс нэг таамаг гарч ирж байгаа нь АН-ын дарга Ерөнхий сайд Г.Занданшатарын талд байгаа бөгөөд УИХ-ын чуулганаар эл асуудал хэлэлцэгдэх үед нэг бол огцруулахгүй байх талд кноп дарах эсхүл УИХ-ын чуулганы хуралдаанд суухгүй байх зэрэг шийдвэр гаргах магадлалтай юм.
Харин нөгөө талд УИХ дахь АН-ын зарим гишүүд Засгийн газрыг ч, УИХ-ын даргыг ч огцруулчихъя гэдэг саналтай байгаа аж. Эрх баригчид ингэж маргалдаж байгаа нь улс орны хувьд таагүй үйл явдал ч сөрөг хүчний хувьд бол "боломж".
Учир нь, АН одоо нэр хүндээрээ МАН-ын дээр байгаа. О.Цогтгэрэлийн хувьд намын дарга болсныхоо дараа "Дараалсан, давхар ялалт" авна гэж амалсан, сөрөг хүчний хувьд 2027, 2028 оныг чиглэсэн марафон нь аль хэдийнэ эхэлчихсэн яваа.
Ямартай ч Засгийн хувь заяаг АН шийдэх нь үнэн бөгөөд бүлгийн шийд гаргах уу, задгайгаар буюу гишүүд нь өөрсдийн итгэл үнэмшлээр кнопоо дарах уу гэдэг л асуулт үлдсэн байна.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна