УИХ-ын гишүүн Т.Аюурсайхан ЗГХЭГ-ын дарга Ц.Нямдоржийн хүү Н.Анхбаярыг "ЗАГНАВ"

УИХ-ын чуулганы хуралдаанаар Монгол Улсын 2021 оны нэгдсэн төсвийн гүйцэтгэл, Засгийн газрын 2021 оны санхүүгийн нэгтгэсэн тайлан болон "Монгол Улсын 2021 оны төсвийн гүйцэтгэл батлах тухай" Монгол Улсын Их Хурлын тогтоолын төслийг хэлэлцэж байна.

Энэ үеэр УИХ-ын гишүүн Т.Аюурсайхан салбарын сайд, яамдын төлөөллийг байлцуулахыг шаардсан юм. 

Тэрбээр, "Нийгэмд үүсээд байгаа хүндрэл бэрхшээл албан тушаалтнуудын хариуцлагагүй байдлаас их болж байгаа. Бүх асуудлыг цар тахал руу чихэж болохгүй. Албан тушаалтнууд хариуцлагагүй ажиллаж байгаа тохиолдол олон байна. Дээр нь зарим томилгоонууд оновчтой биш байна. Бүхнийг дээгүүр тавьсан, хуулиас дээгүүр гишгэсэн асуудлууд байж болохгүй. Н.Анхбаяр дарга аа гадаад харилцааны сайд сонсож байгаа тэ. Энгийн хоёр талын харилцааны асуудлыг ярихаар, хуралдааны дундуур шивнээд шахуу ярьж байгаа шүү дээ. Тэгэхэд ярьж байгаа өнгө аяс чинь таалагдахгүй байна гээд уурлаад утсаа шидчихэж байгаа шүү дээ. Ийм том дарга нар бий болсон байна. Хууль үйлчлэхгүй болохоор ингээд байдаг юм уу.

Төрийн нарийн бичгийн дарга Засгийн газарт ажлаа тайлагнадаг. Харин Засгийн газрын хэрэг эрхлэх газрын дарга нь аав Ц.Нямдорж нь. Төрийн ажлыг төрсөн эцгийнхээ өмнө хариуцна гэж юу байдаг юм. Энэ бол Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийг зөрчиж байна. Хуулиар та хоёрын нэг л ажлаа хийх ёстой. Гэтэл өөдөөс хэрэлдээд сууж байна. Ийм том толгойтой. Төрийн ажлыг төрийн өмнө биш эцгийнхээ өмнө хариуцахаар ийм том болдог юм байна л даа. Бүхнийг дээгүүр яваад сурчихсан.

Сургалтын төлбөрөө татвар төлөгчдийн мөнгөөр төлүүлсэн. Тэгээд төгсөж ирээд төрд таван жил ажиллаад төлбөрөө цайруулдаг журамтай юм гэнэ. Ямар сайхан юм бэ. Тэгвэл бүх залуучууд өөр шиг чинь суралцмаар байна. Гадаадад төрийн мөнгөөр суръя л даа тэд нар, ирээд бэлэн төрийн албанд орчихъё л доо. Бүр даргын албанд орчихъё. Тэгээд мөнгө төгрөгөө сайхан цайруулчихъя л даа. Хууль үйлчилдэггүй. Улс төрд нөлөө бүхий этгээд бусдад давуу байдал олгож болохгүй гээд хуулийн зохицуулалттай шүү дээ. Тухайн үед болдог байсан юм аа гээд хэрэлдээд байгаа. Би бас яривал ярина. Эрдэнэт үйлдвэрт 200-хан мянган ам.доллароор хоёрхон удаа шахаа хийсэн. Тухайн үед болдог байсан гээд чи ярьж байгаа шүү дээ. Тэрбум гаруй төгрөгийг шалихгүй мөнгө гэж ярьдаг тийм том болчихсон. Одоо ингээд өөдөөс хэрэлдээд л сууж байгаа."