"Бэрэн групп" Хөгжлийн банкнаас авсан зээлийнхээ 7.2 сая ам долларыг зориулалтын бусаар ашиглажээ

Яг одоо хөгжлийн банкны нээлттэй сонсгол Төрийн ордонд явагдаж байна. Хөгжлийн Банкны зээлийн асуудалд 65 гэрчийг оролцуулж байна. 

"Бэрэн групп" ХХК нь хамаарал бүхий этгээд болох "Нэхээсгүй эдлэл" ХК, "Атар өргөө" ХК, "Бэрэнтрэйд" ХХК-ийн зээл зээлийн хүүгийн төлбөрт төлсөн 5,7 сая ам.доллар, компанийн хувьцаа эзэмшигч Б.Мөнхтөрийн дансанд шилжүүлж хувийн хэрэгцээнд ашигласан 1,5 сая ам.доллар нийт 7,2 сая ам долларынн зээлийг зориулалт бусаар зарцуулсан байна. 

“Бэрэн групп” нь Хөгжлийн Банкнаас хоёр удаагийн зээл авсан байдаг. Үүнд:

• Засгийн газрын 2013 оны 256 дугаар тогтоол, Монгол Улсын Хөгжлийн Банкны ТУЗ-ийн 2014 оны хоёрдугаар сарын 11-ний өдрийн 8 дугаар тогтоолын хүрээнд 27.2 сая хүртэлх ам.долларын зээлийг “Бэрэн групп” ХХК-д 45 сарын хугацаатай Арматурын үйлдвэр зориулан олгохоор шийдвэрлэсэн. 
• ТУЗ-ийн 2017 оны есдүгээр сарын 28-ны өдрийн хуралдааны 7 дугаар тэмдэглэлийн дагуу 18 сая хүртэлх ам.доллар зээлийг “Бэрэн групп” ХХК-д 36 сарын хугацаатай олгохоор шийдвэрлэсэн. Төслийн санхүүжилтэд зориулж 11.6 сая ам.долларын зээлийг олгосон бөгөөд зээлийн хяналтаар 2.6 сая ам.доллар орчим зээлийн зарцуулалт баталгаажаагүй тул үлдэгдэл санхүүжилт болох 6,347,773.51 ам.долларыг банк олгоогүй гэсэн түүхтэй байна. Уг зээлийн хугацаа 2020 оны аравдугаар сарын 23-ны өдөр дуусжээ.