Өчигдөр /2023.08.07/ БЗД-ийн нутаг дэвсгэрт хэд хэдэн удаа буун дуу гарсан талаар бид өмнө мэдээлсэн. Тэгвэл цагдаагийн байгууллагаас үүнтэй холбоотой асуудлаар мэдээлэл хийлээ.
Өчигдөр цагдаагийн байгууллагад бусдын эрх чөлөөнд зэвсэг болон зэвсгийн чанартай зүйл хэрэглэж халдсан гэх дуудлага мэдээлэл ирсэн. Тодруулбал БЗД-ийн нутаг дэвсгэрт 33 настай иргэн У-н биед 39 настай иргэн Б халдсан байна. Улмаар хэрэг үйлдсэн этгээд хэргийн газраас зугтсан байна. Харин цагдаагийн алба хаагчид Бөхийн өргөөний урд хэсэгт байрлах 22-р байр орчмоос хэрэг үйлдээд зугтсан Б-г олжээ. Тухайн иргэн гартаа хутга барьсан байсан бөгөөд цагдаагийн байгууллагын шаардлагыг хүлээн аваагүй талаар ЦЕГ мэдээллэв.
Мөн хэрэг үйлдсэн этгээд цагдаагийн байгууллагын шаардлагыг хүлээн аваагүй учраас хүч нэмэгдүүлэн ирж, 22:10-24:10 цаг хүртэл хэлэлцээр хийсэн байна. Улмаар цагдаагийн алба хаагчид албадлага хэрэглэх шаардлага үүссэн учраас резинэн сумтай буугаар буудсан байна.
Энэ талаарс НЦУГ-аас "Хэрэг үйлдсэн этгээдийн сэтгэл зүйн байдал тогтворгүй байсан. Ямар нэг байдлаар өөртөө болон бусдад аюул учруулж болзошгүй байсан. Тухайн орчим дахь иргэдийн амь нас эрүүл мэндийг хамгаалах, цагдаагийн алба хаагчдийн эрүүл мэндийг хамгаалах, тухайн иргэн өөртөө аюул учруулахгүй байлгах үүднээс цагдаагийн байгууллагаас шаардлага тавьсан. Шаардлага биелүүлээгүй учраас эхний ээлжинд анхааруулж хий буудсан. Дараа нь хоёр удаа тухайн хүний биеийн зөөлөн хэсэгт буудсан" гэлээ.
Хэрэг үйлдсэн Б нь өмнө таван удаагийн ял шийтгэлээр шийтгэгдэж байсан хэмээн цагдаагийн байгууллагаас мэдээллэв.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна