Минимализм ''үхсэн''| Максимализмтай ТАНИЛЦ

''Ямар нэг эд зүйл танд баяр баясал цацруулахгүй мэт санагдаж байвал гаргаж хая'' хэмээдэг Мери Кондогийн арга барил дэлхий нийтийг байлдан дагуулж минималист үзэлтэй хүмүүсийн тоо сүүлийн жилүүдэд огцом нэмэгдээд байсан. 

Зөвхөн өөрт хэрэгцээтэй зүйлсээ үлдээж, бусад зүйлсээ гаргаж хаяхыг уриалдаг минимализм ямар зүйлсийг ''хэрэгтэй'', ямар зүйлсийг ''хэрэггүй'' гэдэг ангилалд оруулахаа мэдэхгүй зовдог хүмүүст аймшигтай хар дарсан зүүд мэт санагддаг. 

Эд юмс бүхэн утга учиртай, өөрийн гэсэн үүрэгтэй байдаг. ''Хэрэггүй гэж бодоод хаясан хойноо харамсах вий'' гэдэг бодол эдгээр хүмүүсийн тархинд уяатай байдаг. 

Илүү дутуу зураг, чимэглэлгүй цайвар өнгөтэй хана, энгийн оршихуйг ерөнхийд нь минимализм гэдэг. Амьдралыг хөнгөвчилж, стрессээс ангижруулдаг минимализмийг таашаан шүтэн бишрэх хүмүүс цөөнгүй. Минимализмийн ''эсрэг туйл'' гэж хэлж болох максимализм гэж тэгвэл юуг хэлэх вэ?

Минимализмийн эсрэг туйл гэнгүүт хэрэггүй зүйлс маш ихээр цуглуулж, өрөөгөө дүүртэл чихэхийн нэр гэж ойлгож болохгүй. Зоримог, хурц өнгө, том хээ угалз, өвөрмөц тавилгын шийдэл, хөшөө баримал, урлагийн бүтээл, олон өнгийн нийлбэрийг максимализм гэнэ. 

Хивс, уран зураг, хананы өнгө, буйдангийн бүрээс, номын тавиур, таримал цэцгүүд тань таныг тодорхойлно. 

Максималист үзэлтэй хүний гэрт зочлоход яг л тэдний тархин доторхыг харж буй мэт санагдана. Өрөөний булан бүр өөр өөрийн гэсэн түүх илэрхийлэх мэт, замбараагүй атлаа учиргүй гоо үзэсгэлэнтэй. 

''Би максималист болсноос хойш амьдралаас улам их аз жаргалыг мэдрэх болсон. Миний эмээ максималист үзэлтэй хүн байсан. Түүний гэрээр дүүрэн таримал цэцгүүд, уран зургууд, бэлэг дурсгал, сувинерийн зүйлс байдаг байлаа. Би тэднийд очоод амьдрал ямар баялаг гэдгийг ойлгох шиг болдог байлаа'' хэмээн дизайнер Ааника Изора өгүүлсэн байдаг.

Хүн бүрийн гоо зүйн мэдрэмж ялгаатай. Зарим хүмүүс өдөр тутмын амьдралынхаа замбараагүй байдлаас түр ч атугай ангижрахын тулд минимал стилээр орчноо тохижуулдаг бол зарим хүмүүст минимализм ''аз жаргалгүй'', ''хоосон'' санагддаг байна.

Хүн төрөлхтөн өөрсдийн ялгаатай байдлыг хүлээн зөвшөөрч, бусдын таашаадаг зүйлийг хүндэлж, ойлгох хэрэгтэйг санаарай.