УИХ-ын дарга хэмнэх хэрэгтэй гэсэн ч Дээд шүүх 400 сая төгрөгөөр ТАВИЛГА ХУДАЛДАЖ АВНА

Хэдхэн хоногийн өмнө УИХ-ын дарга Г.Занданшатар УИХ-ын чуулганы нэгдсэн хуралдааны үеэр "Ард иргэд хэмнэлтийн горимд шилжих шаардлагатай байна" хэмээн мэдэгдсэн. Эдийн засаг хүнд үед төрийн худалдан авалт, тендер, үрэлгэн зардлыг танах талаар шат шатандаа ярьж байна. 

Гэтэл төрийн байгууллагууд ар араасаа өндөр дүнтэй тавилга, тоног төхөөрөмжийн тендер худалдан авалт хийж байгаа нь улс орны эдийн засгийн нөхцөл байдал хамаагүй мэт. 

Үүний нэг жишээ нь Улсын дээд шүүх 400 сая төгрөгөөр тавилга худалдан авах тендер зарласан байна. 

Хуучирсан тавилгаа сольж шинээр авж болохгүй гэхээсээ илүү хямралын энэ хүнд үед ард түмний татвараас боссон улсын төсвийн 400 сая төгрөгөөр тавилга авах нь зохисгүй мэт. 

Үүнээс илүү шийдэх ёстой асуудал шүүх байгууллагад олон бий. Жишээ нь шүүхийн дийлэнх ачааллыг үүрдэг шүүхийн захиргааны ажилтнуудын нийгмийн баталгаа, цалин хангамжийг сайжруулах нэн шаардлагатай. Түүнчлэн шүүхийн хүний нөөцийн бодлого тогтворгүй, шүүхийн ачаалал буурахгүй хэвээрээ л байна. Шүүгчийн цалин нэмэгдсэн ч захиргааны ажилтнуудын цалин бага. Тавилгад зарцуулж буй 400 сая төгрөгөө захиргааны ажилтнуудынхаа цалинг нэмэхэд зарцуулбал нүдээ олсон, асуудлаа харсан шийдвэр байх болов уу ? 

Үеэс үед бүсээ чангалсаар байсан иргэд хоногийн хоолооч залгуулж чадахгүй нөхцөл байдалд хүрээд байна. Харин нөгөө талд УИХ-ын дарга нь хэмнэлтийн горимд шилжих хэрэгтэй байна гэж хэлсээр байхад энэ мэт төрийн байгууллагууд үрэлгэн зардал, нүдээ олоогүй тендерүүдыг ар араас нь зарлаж байгаа нь улсын хямралт нөхцөл байдал хамаагүй мэт. 

Тендерийн урилгын холбоос: https://www.tender.gov.mn/mn/i...