Р.Мөнхтуяа: Иргэн Г.Ган-Очирын дансанд тийм хэмжээний мөнгө огт байхгүй, орлого зарлагын гүйлгээ хийгдээгүй

Иргэн н.Ган-очирын дансанд байршсан гэх 9,9 их наядын талаар Хаан банкнаас мэдээлэл хийлээ.

Хаан банкны гүйцэтгэх захирал Р.Мөнхтуяа: "Өчигдөр цацагдсан мэдээлэлтэй холбоотойгоор тайлбар мэдээлэл хийе. Хаан банк нь үйл ажиллагаандаа Монгол улсын хууль тогтоомжийг өрдөн ажилладаг  бөгөөд аливаа хууль бус үйл ажиллагааг огт дэмждэггүй болохыг албан ёсоор мэдэгдэж байна. 

Иргэн Ган-Очирын дансанд шилжилт хөдөлгөөний хязгаарлалтыг хасах дүнгээр системийн боломжит оронгоор тооцоолон хийсэн. Хасах дүнтэй дансны үлдэгдэл харагдаж байгаа нь дансанд энэ хэмжээний мөнгөн байгаа гэсэн утга биш бөгөөд, дансны хөдөлгөөнийг банкны системийн боломжит дээд оронгоороо хязгаарласан тухай ийм мэдээлэл байгаа. 

Бичлэг дээр асар их оронтой тоо нь хасах тэмдэгтэй байгааг та бүхэн харж байгаа байх. Банк харилцагчдынхаа нууцлалыг хадгалж,  данстай холбоотой нууцлалыг өөрөөс нь зөвшөөрөл авалгүйгээр ярих боломжгүй байгаа. 

Тухайн харилцагчийн дансанд аливаа мөнгө орлогодсон, түүнийг буцааж зарлагадсан тухай байдал огт байхгүй. Хаан банкны нийт актив хөрөнгө бол 11 сарын 30-ны байдлаар 13,4 их наяд төгрөгийн хэмжээтэй байж байна. Тэгэхээр нэг харилцагч дээр ийм их хэмжээний гүйлгээ гарах боломжгүй байгаа. 

Барилт хийсэн дансанд зарлагын гүйлгээг нь хязгаарлах зорилгоор хийгддэг гэсэн үг. Дансанд нь мөнгө оруулахгүй гаргахгүй, хөдөлгөөнгүй болгочихсон. 

Банк 20 сая төгрөгөөс дээш бүх гүйлгээ тайлагнагддаг. Мөнгөн дүнгийн хувьд тийм их хэмжээний гүйлгээ хийх боломжгүй. Манай банкин дахь иргэний дансанд тийм хэмжээний мөнгө огт байхгүй, орлого зарлагын гүйлгээ хийгдээгүй" гэлээ.