Ц.Анандбазар: Би долдугаар ангидаа нүүрс гэртээ оруулж байснаа санаж байна. Тэрнээс хойш нүүрс хутгаж үзээгүй

Өнөөдөр АТГ-аас УИХ-ын гишүүн Ц.Анандбазарыг нүүрсний хулгайн хэрэгт холбоо хамааралтай хэмээн зарласан.

Тэрбээр тухайн асуудлаар Зариг.мн сайтад өгсөн тайлбар мэдээлэлдээ "Өнөөдөр Монгол улсын нүүрсний хулгайн асуудал бол бүх хүний анхаарлын төвд орсон том асуудал болж байна. Нүүрсний хулгайг илрүүлэх ажлын хэсгийн нэг гишүүн нь би байгаа юм. Ажлын хэсэг ажлаа хийж дуусаагүй байхад ийм сөрөг пиар цацаж байгаа нь ажлын хэсгийг ажиллуулахгүй гэсэн нүүрсний хулгайч нарын ажил байна гэж бид үзэж байна. Миний бие нүүрсний компанийн нэг ч хувьцаа эзэмшдэггүй. Нэг ширхэг уурхайн лиценз байхгүй. 

Өнөөдөр Монголын ард түмний боломжийг хулгайлсан нүүрсний хулгайч нар амь тавих дөхөөд огт оролцдоггүй гишүүдийн нэрийг оруулж энэ хулгайгаа алга болгох гэж оролдож байна гэж бодож байна. 

Би долдугаар ангидаа нүүрс гэртээ оруулж байснаа санаж байна. Тэрнээс хойш нүүрс хутгаж үзээгүй . Хүрз нүүрс гаргаж үзээгүй хүнийг нүүрсний хулгайд сэрдэнэ гэдэг бол өөрсдийнхөө мөрийг баллуурдах гэж байгаа ийм л ажил байгаа юм. 

Өөдөө хаясан чулуу өөрийн толгой дээр гэдэг Монгол ардын зүйр цэцэн үг байдаг. Хариуцлагатайгаар мэдэгдэхэд энэ хулгайч нар зам мөрөө баллахын тулд ийм арга хэрэглэж үүнийг нь АТГ маш хөнгөн хуумгай мэдэгдэл хийж байгаад харамсаж байна. Юм бүхэнд нэрийг маань оруулдаг боллоо, бүрэн эрхээсээ түдгэлзээд ч хамаагүй шалгуулж, нотолно" гэлээ.